യൂനിഫോം തയ്​ച്ചില്ല, പെരുന്നാളും ഒാണവുമില്ല; പട്ടിണിയുടെ വക്കിൽ തയ്യൽ തൊഴിലാളികൾ

പെരിന്തൽമണ്ണ: രണ്ടു പെരുന്നാളും വിഷുവും സ്കൂൾ സീസണും കഴിഞ്ഞ് ഒാണമെത്തി. തയ്യൽ ചക്രം ചവിട്ടിത്തിരിച്ച് ജീവിതം നീക്കിയിരുന്ന ആയിരക്കണക്കിന് തൊഴിലാളികൾക്ക് സീസണുകളാണിവയെല്ലാം. പക്ഷേ പട്ടിണിയുടെ വക്കത്താണ് ഈ കുടുംബങ്ങൾ.

തൊഴിൽ നിലച്ചിട്ട് അഞ്ചുമാസം പിന്നിട്ടു. സ്കൂൾ സീസണിൽ രാവും പകലും ജോലിയെടുത്താണ് യൂനിഫോമുകൾ തൈച്ചിരുന്നത്. ഒാണത്തിനും െപരുന്നാളിനും അങ്ങനെ തന്നെയായിരുന്നു. ഉത്സവങ്ങളും സ്കൂൾ സീസണും കഴിഞ്ഞാൽ വിവാഹാഘോഷങ്ങളാണ് മറ്റൊന്ന്. വിവാഹങ്ങൾ ചടങ്ങുകളായതോടെ ആ പ്രതീക്ഷയും പൊലിഞ്ഞു. വർഷങ്ങളായി സംഘടിത തൊഴിൽമേഖലയായ ഇവർക്ക് ക്ഷേമനിധിയുണ്ട്. 20 രൂപ മാസം അടച്ചിരുന്ന അംശാദായം ഇപ്പോൾ 50 രൂപയായി.

വർഷത്തിൽ 600 രൂപ അടക്കാൻപോലും തൊഴിലാളികൾക്കാവുന്നില്ലെന്ന് ടൈലറിങ് ആൻഡ്​ ഗാർമെൻറ്സ് വർക്കേഴ്സ് യൂനിയൻ സംസ്ഥാന ഭാരവാഹി ഖാദർ അങ്ങാടിപ്പുറം പറഞ്ഞു. അശംദായം കൂട്ടിയെങ്കിലും ആനുപാതികമായി ആനുകൂല്യങ്ങൾ കൂട്ടിയിട്ടില്ല. മറ്റു ക്ഷേമനിധികളെ അപേക്ഷിച്ച് പരിമിതമായ ആനൂകൂല്യങ്ങളാണ്. 60 വയസ്സായാൽ എല്ലാവർക്കും ക്ഷേമ പെൻഷനുണ്ടെന്നിരിക്കെ സർക്കാറിലടച്ച പണം തുച്ഛവിഹിതമായാണ് ആനുകൂല്യമായി കിട്ടുന്നത്.