കുഞ്ഞി​െൻറ വിരലുകൾ ഇഡ്ഡലിത്തട്ടിൽ കുടുങ്ങി; രക്ഷകരായി ഫയർഫോഴ്സ്

പെരിന്തല്‍മണ്ണ: ഒരു വയസ്സായ കുട്ടിയുടെ ഇരുകൈയിലെയും വിരലുകളിൽ കുടുങ്ങിയ ഇഡ്ഡലിത്തട്ട്​ മുറിച്ചുമാറ്റി പെരിന്തൽമണ്ണ ഫയർ ആൻഡ്​ റെസ്‌ക്യൂ വിഭാഗം രക്ഷകരായി. ഒരു കൈയിലെ തട്ട് പ്രയാസപ്പെട്ട് ഊരിയെടുത്തെങ്കിലും ചെറിയ ദ്വാരത്തില്‍ കുടുങ്ങിയ മറ്റേ കൈവിരല്‍ ഊരിയെടുക്കാന്‍ പറ്റാത്തവിധം വീങ്ങിയിരുന്നു. സാധാരണ മെറ്റല്‍ കട്ടർ ഉപയോഗിച്ചായിരുന്നു രക്ഷാപ്രവര്‍ത്തനം. കുഞ്ഞിനെ മാതാവി​െൻറ മടിയിലിരുത്തി പുതപ്പുകൊണ്ട് മൂടി കാഴ്ച മറച്ചു.

കട്ടറി​െൻറ ശബ്​ദം കേള്‍ക്കുമ്പോള്‍ കുട്ടി കൈ ഇളക്കുന്നതും കരയുന്നതും വെല്ലുവിളിയായി. മുക്കാല്‍ മണിക്കൂർ നീണ്ട പ്രയത്‌നത്തിലൂടെ ഇഡ്ഡലിത്തട്ട് മുറിച്ച് വിരല്‍ ഊരിയെടുത്തു. മാനത്തുമംഗലം സ്വദേശി മുസ്തഫയുടെ മകളുടെ കൈകളാണ് അബദ്ധത്തിൽ കുടുങ്ങിയത്.

പെരിന്തല്‍മണ്ണ സ്​റ്റേഷന്‍ ഓഫിസര്‍ സി. ബാബുരാജ്, സീനിയര്‍ ഫയര്‍മാന്‍ വി. അബ്​ദുൽ സലീം, ജീവനക്കാരായ നിയാസുദ്ദീന്‍, ടിജോ തോമസ്, കെ.വി. സുജിത്ത്, അഭിലാഷ്, സനോജ്, അശോക് കുമാര്‍, ഗോപകുമാര്‍, ടോമി തോമസ്, കുട്ടികൃഷ്ണന്‍ തുടങ്ങിയവരാണ് സംഘത്തിലുണ്ടായിരുന്നത്.