നിലമ്പൂർ ഗവ. കോളജ്: എം.എൽ.എ ഓഫിസിന് മുന്നിൽ കെ.എസ്.യു ഭിക്ഷാടന സമരം

നിലമ്പൂർ: വാടക കെട്ടിടത്തിന്‍റെ പരിമിതിക്കുള്ളിൽ പ്രവർത്തിക്കുന്ന നിലമ്പൂർ ഗവ. കോളജിന്‍റെ ശോച്യാവസ്ഥ പരിഹരിക്കണമെന്ന ആവശ‍്യവുമായി കെ.എസ്.യു നിലമ്പൂർ നിയോജക മണ്ഡലം കമ്മിറ്റി പി.വി. അൻവർ എം.എൽ.എയുടെ ഓഫിസിന് മുന്നിൽ ഭിക്ഷാടന സമരം നടത്തി.

ഏഴ് വർഷമായി വാടക കെട്ടിടത്തിൽ പ്രവർത്തിക്കുന്ന നിലമ്പൂർ ഗവ. കോളജിനാവശ്യമായ സ്ഥലവും, കെട്ടിടവും ഉടൻ യഥാർഥ്യമാക്കണമെന്നാവശ്യപ്പെട്ടായിരുന്നു ഭിക്ഷാപാത്രവുമായി വിദ‍്യാർഥികളുടെ സമരം. നിലമ്പൂർ ബ്ലോക്ക്‌ കോൺഗ്രസ്‌ പ്രസിഡന്റ്‌ ഗോപിനാന്ദൻ സമരം ഉദ്ഘാടനം ചെയ്തു. കെ.എസ്.യു നിയോജക മണ്ഡലം പ്രസിഡന്റ് ഷമീർ കാസിം അധ്യക്ഷത വഹിച്ചു.

അഡ്വ. ഷെറി ജോർജ്, ഷിബു പുത്തൻവീട്ടിൽ, ഷെഫീഖ് മണലോടി എന്നിവർ സംസാരിച്ചു. ആഖിൽ റഹ്മാൻ, ആരോമൽ ശ്രീകാന്ത്, ഫാത്തിമ്മ സനില, ഷാഹുൽ ഹർഷക്ക് നേതൃത്വം നൽകി.