ലോക്സഭ തെരഞ്ഞെടുപ്പ്; പിടിച്ചെടുത്തത് 16.86 കോടിയുടെ വസ്തുക്കൾ
text_fieldsമലപ്പുറം: ലോക്സഭ തെരഞ്ഞെടുപ്പിന്റെ സുതാര്യമായ നടത്തിപ്പുമായി ബന്ധപ്പെട്ട് പ്രവര്ത്തിക്കുന്ന വിവിധ സ്ക്വാഡുകളുടെയും പൊലീസ്, എക്സൈസ്, ഡി.ആര്.ഐ തുടങ്ങിയ വകുപ്പുകളുടെയും നേതൃത്വത്തില് നടത്തിയ പരിശോധനകളില് ജില്ലയില്നിന്ന് ഇതുവരെ പിടിച്ചെടുത്തത് 16.86 കോടി രൂപയുടെ വസ്തുക്കള്. മാതൃകാപെരുമാറ്റച്ചട്ടം നിലവിൽ വന്ന മാര്ച്ച് 16 മുതല് ഏപ്രില് 18 വരെയുള്ള കണക്കാണിത്.
ജില്ലയിലെ 16 നിയമസഭ മണ്ഡലങ്ങളിൽ നടത്തിയ പരിശോധനകളിൽ 1.53 കോടി രൂപ പണമായും 11.55 ലക്ഷം രൂപ വില വരുന്ന 1214.65 ലിറ്റർ മദ്യവും 3.80 കോടി രൂപ വിലവരുന്ന കഞ്ചാവ് ഉൾപ്പെടെ 22.47 കിലോഗ്രാം മയക്കുമരുന്നും 69. 93 ലക്ഷം രൂപ വില വരുന്ന മറ്റു വസ്തുക്കളും പിടിച്ചെടുത്തു. ഇതോടൊപ്പം 10.71 കോടി രൂപയുടെ 14.68 കിലോ സ്വർണവും പിടിച്ചെടുത്തിട്ടുണ്ട്.
കരിപ്പൂർ വിമാനത്താവളത്തിലും കൊണ്ടോട്ടി, മലപ്പുറം മണ്ഡലങ്ങളിലുമുള്ള ഡി.ആർ.ഐ (ഡയറക്ടറേറ്റ് ഓഫ് റവന്യൂ ഇന്റലിജൻസ്) സ്ക്വാഡുകള് അടക്കമുള്ളവയുടെ പരിശോധനകളിലാണ് സ്വർണം പിടിച്ചെടുത്തത്. കൊണ്ടോട്ടി മണ്ഡലത്തിൽനിന്ന് 5.15 കോടി രൂപ വില വരുന്ന 6.5 കിലോ സ്വർണവും മലപ്പുറം മണ്ഡലത്തിൽനിന്ന് 5.55 കോടി രൂപ വില വരുന്ന 8.17 കിലോ സ്വർണവും പിടികൂടിയിട്ടുണ്ട്. പെരിന്തൽമണ്ണ, തിരൂരങ്ങാടി, കോട്ടക്കൽ മണ്ഡലങ്ങളിൽനിന്നാണ് ഏറ്റവും കൂടുതൽ പണം പിടിച്ചെടുത്തിട്ടുള്ളത്.
പെരിന്തൽമണ്ണയിൽനിന്ന് 50.24 ലക്ഷം രൂപയും തിരൂരങ്ങാടിയിൽനിന്ന് 45.42 ലക്ഷവും കോട്ടക്കലിൽനിന്ന് 38.88 ലക്ഷം രൂപയും പിടിച്ചെടുത്തിട്ടുണ്ട്. നിലമ്പൂർ, പെരിന്തൽമണ്ണ, വണ്ടൂർ മണ്ഡലങ്ങളിൽനിന്നും യഥാക്രമം 386 , 335, 106 ലിറ്റർ മദ്യവും പിടിച്ചെടുത്തവയിൽ പെടുന്നു.
പൊന്നാനി, മഞ്ചേരി, തവനൂർ മണ്ഡലങ്ങളിൽനിന്നാണ് ഏറ്റവും കൂടുതൽ മയക്കുമരുന്ന് പിടികൂടിയത്. പിസ്റ്റള്, ഇന്നോവ കാര്, നാലു ഡ്രോണ് കാമറകള് എന്നിവയും പിടിച്ചെടുത്ത വസ്തുക്കളില് ഉള്പ്പെടുന്നു. എക്സൈസ് സംഘം വെള്ളിയാഴ്ച ജില്ലയില് നടത്തിയ പരിശോധനകളില് ഏറനാട്, പെരിന്തല്മണ്ണ നിയമസഭ മണ്ഡലത്തില് നിന്നും നാലു ലിറ്റര് വിദേശ മദ്യം വീതവും മഞ്ചേരിയില് നിന്നും 3.5 ലിറ്റര് വിദേശ മദ്യവും പിടികൂടിയിട്ടുണ്ട്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.