ഒരു വാർഡിൽ ഒരേ പേരിൽ മൂന്ന് സ്ഥാനാർഥികൾ

കോട്ടക്കൽ: ഒരു വാർഡിൽ ഒരേ പേരിൽ മൂന്ന് സ്ഥാനാർഥികൾ. ഇതിൽ രണ്ടുപേരുടെ വീട്ടുപേരും ഒന്നു തന്നെ. ഒതുക്കുങ്ങൽ ഗ്രാമപഞ്ചായത്തിലെ മൂന്നാം വാർഡായ തെക്കുമുറിയിലാണ് ഈ കൗതുകം. കുരുണിയൻ ഹസീനമാരാണ് എൽ.ഡി.എഫി​െൻറയും യു.ഡി.എഫി​െൻറയും സ്ഥാനാർഥികൾ. കോൺഗ്രസ്, സി.പി.എം സ്ഥാനാർഥികളാണ് ഇരുവരും. എസ്.ഡി.പി.ഐക്കായി മത്സരിക്കുന്നത് കൈതക്കൽ ഹസീനയാണ്.

വർഷങ്ങൾക്ക്​ മുമ്പും കുരുണിയൻ കുടുംബത്തിലെ രണ്ടു പേർ മത്സര രംഗത്തുണ്ടായിരുന്നു. ഹമീദും മായിനും. മൂന്നാം വാർഡിൽ നിലവിൽ ജനപ്രതിനിധി എൽ.ഡി.എഫിലെ മായിനാണ്​. വനിത സംവരണമായതോടെ സീറ്റ് ലഭിച്ചത് ഹസീനക്കായിരുന്നു. നേരത്തേ രണ്ടാം വാർഡിൽ മത്സരിച്ച ഇവർ രണ്ടാം തവണ സ്വന്തം വാർഡിൽ നിന്നാണ് ജനവിധി തേടുന്നത്. പൊതുപ്രവർത്തകനായ കുരുണിയൻ ഹക്കീമാണ് ഭർത്താവ്. വിദ്യാർഥികളായ മുഹമ്മദ് ഫായിസ്, മുഹമ്മദ് ഹാഷിർ എന്നിവർ മക്കളാണ്.

കോൺഗ്രസ്​ സ്ഥാനാർഥി ഹസീന മൂന്നാം വാർഡിൽ മൂന്നാം തവണയാണ് മത്സരിക്കുന്നത്. ആദ്യ മത്സരത്തിൽ പാറക്കൽ റസിയയെ പരാജയപ്പെടുത്തിയതോടെ ലഭിച്ചത്​ പഞ്ചായത്ത് ഉപാധ്യക്ഷ സ്ഥാനം. രണ്ടാം തവണ ജനറൽ സീറ്റായിരുന്നെങ്കിലും നിയോഗിക്കപ്പെട്ടത് ഹസീനയായിരുന്നു. എന്നാൽ, എതിർ സ്ഥാനാർഥി കുരുണിയൻ മായിനായിരുന്നു വിജയം. നൊട്ടനാലക്കൽ സ്വദേശി മുഹമ്മദ് സലീമിെൻറ ഭാര്യയാണ്​. മുഹമ്മദ് ഷിബിലി, ഫാത്തിമ ഷംലി എന്നിവരാണ് മക്കൾ. ഒരേ തറവാട്ട് പേരുണ്ടെന്നേയുള്ളൂ, സ്ഥാനാർഥികൾ നേരിട്ട് ബന്ധുക്കളല്ല. എസ്.ഡി.പി.ഐ സ്ഥാനാർഥിയായ ഹസീന കൈതക്കൽ രണ്ടാം തവണയാണ് ജനവിധി തേടുന്നത്. സജീവ പ്രവർത്തകനായ ഫിറോസിെൻറ ഭാര്യയാണ്. സ്വന്തം വാർഡിലാണ് മത്സരിക്കുന്നത്. മൂന്ന് മക്കളുണ്ട്.