ജീവിതം ലോക്കായി; ശ്രീരാജ് തൊഴിലാളിയായി

കരുവാരകുണ്ട്: കോവിഡ് ഭീതിയിൽ പഠനത്തോടൊപ്പം ജീവിതത്തിന് കൂടി ലോക്ക് വീണതോടെ തൊഴിലാളി വേഷമണിഞ്ഞ് 19കാരൻ. കണ്ണത്ത് ചിലമ്പിലക്കൈ കൊളത്തൂർ പരമേശ്വര​െൻറ മകൻ ശ്രീരാജാണ് അഞ്ചംഗ കുടുംബത്തിന് അത്താണിയാവാൻ കൂലിവേലക്കിറങ്ങിയത്.

പത്താം ക്ലാസിൽ ഉയർന്ന മാർക്ക് വാങ്ങിയ ശ്രീരാജ് പ്ലസ് ടുവിന് ശേഷം പടപ്പറമ്പ് പരവെക്കൽ ഗവ. ഐ.ടി.ഐയിൽ ഡ്രാഫ്റ്റ് മാൻ സിവിലിന് ചേർന്നു. കോവിഡ് പരന്നതോടെ ഈ വർഷം ക്ലാസ് തുടങ്ങിയില്ല. അച്ഛൻ പരമേശ്വരൻ അസുഖം കാരണം ജോലിക്ക് പോകാറില്ല.

അമ്മ കടകളിലും അടക്കാ കളത്തിലും ജോലിയെടുത്താണ് കുടുംബം പോറ്റിയിരുന്നത്. ലോക്ഡൗണിൽ അതും മുടങ്ങിയതോടെ മൂന്നു മക്കളടങ്ങുന്ന വീട്ടിൽ പരാധീനതയായി. ഇതോടെയാണ് ശ്രീരാജ് കൂലിവേലക്കിറങ്ങിയത്.