ഒരു കൈയബദ്ധം, സ്ഥാനാർഥി വോട്ടർപട്ടികയിലില്ല; അവസാനം പിൻവലിച്ച് തടിതപ്പി

എടപ്പാൾ: വട്ടംകുളം പഞ്ചായത്ത് 10ാം വാർഡിൽ യു.ഡി.എഫ് സ്ഥാനാർഥിക്ക് വോട്ടർപട്ടികയിൽ പേരില്ല. പ്രചാരണം ആരംഭിച്ച് രണ്ട് ദിവസം കഴിഞ്ഞാണ് മുസ്​ലിം ലീഗ് പ്രതിനിധിയായ വനിത സ്ഥാനാർഥിക്ക് വട്ടംകുളം പഞ്ചായത്ത് പരിധിയിലെ വോട്ടർപട്ടികയിൽ പേരില്ലെന്നറിയുന്നത്.

സ്ഥാനാർഥിയുടെ സ്വന്തംവീട് ആലങ്കോട് പഞ്ചായത്തിലാണ്. അവിടത്തെ വോട്ടർപട്ടികയിലാണ് പേരുള്ളത്. വട്ടംകുളം നെല്ലിശ്ശേരിയിലുള്ള ഭർത്താവി​െൻറ വീട്ടിലാണ് നിലവിൽ താമസിക്കുന്നത്. ഒടുവിൽ ലീഗ് നേതൃത്വം സ്ഥാനാർഥിയെ പിൻവലിച്ച് തടിതപ്പി. പുതിയ സ്ഥാനാർഥിയെ പ്രാഖ്യാപിക്കുകയും ചെയ്തു. വിഷയം എതിർസ്ഥാനാർഥികൾ പ്രചാരണ ആയുധമാക്കിയിരിക്കുകയാണ്.