ഹോക്കി: മലപ്പുറം, മങ്കട ഉപജില്ലകള്‍ ജേതാക്കള്‍

മൊറയൂര്‍: റവന്യൂ ജില്ല ജൂനിയര്‍ ഹോക്കി മത്സരത്തില്‍ ആണ്‍കുട്ടികളുടെ വിഭാഗത്തില്‍ മലപ്പുറം ഉപജില്ലയെ പ്രതിനിധാനം ചെയ്ത ചെമ്മങ്കടവ് പി.എം.എസ്.എ.എം ഹയര്‍ സെക്കന്‍ഡറി സ്കൂളും പെണ്‍കുട്ടികളുടെ വിഭാഗത്തില്‍ മങ്കട ഉപജില്ലയിലെ കടുങ്ങപുരം ഗവ. ഹയര്‍ സെക്കന്‍ഡറി സ്കൂളും ജേതാക്കളായി. ഈ മാസം 10ന് കൊല്ലത്ത് നടക്കുന്ന സംസ്ഥാന ചാമ്പ്യന്‍ഷിപ്പില്‍ ജില്ലയെ പ്രതിനിധാനം ചെയ്ത് ഈ ടീമുകള്‍ മത്സരിക്കും.

മൊറയൂര്‍ വി.എച്ച്.എം ഹയര്‍ സെക്കന്‍ഡറി സ്കൂള്‍ മൈതാനത്ത് നടന്ന റവന്യൂ ജില്ല മത്സരങ്ങള്‍ ഗ്രാമപഞ്ചായത്ത് പ്രസിഡന്‍റ് സുനീറ പൊറ്റമ്മല്‍ ഉദ്ഘാടനം ചെയ്തു. മുഹമ്മദ് ശരീഫ്, ഡി.ടി. മുജീബ്, ഉസ്മാന്‍, രവീന്ദ്രന്‍, സി.ടി. നാസര്‍, ഷറഫുദ്ദീന്‍ റിസ്വി എന്നിവർ സംബന്ധിച്ചു.