കരിപ്പൂരിൽ കഴിഞ്ഞ വർഷം പിടികൂടിയത്​ 88 കോടിയുടെ സ്വർണം

കരിപ്പൂർ: കോഴിക്കോട്​ വിമാനത്താവളത്തിൽ 2021-22 സാമ്പത്തിക വർഷം പിടികൂടിയത്​ 88 കോടി രൂപയുടെ സ്വർണം. എയർ കസ്റ്റംസ്​ ഇന്‍റലിജൻസ്​ കഴിഞ്ഞ ഏപ്രിൽ ഒന്ന്​ മുതൽ 2022 മാർച്ച്​ 31 വരെ പിടികൂടിയ കണക്കാണിത്​. ഈ കാലയളവിൽ 200 കിലോഗ്രാം സ്വർണമാണ്​ കണ്ടെടുത്തത്​​. 241 കേസുകൾ​​ രജിസ്റ്റർ ചെയ്തു​. ജനുവരി-മാർച്ച്​ മാസങ്ങളിലായി 77 കേസുകളിൽ 54.95 കിലോഗ്രാം സ്വർണം പിടികൂടി​. ഇതിന്​ 24.87 കോടി രൂപ വിലവരും. ഈ കാലയളവിൽ സ്വർണക്കടത്തിന്​ പിടിയിലായവരിൽ ഏഴ്​ സ്ത്രീകളും ഉൾപ്പെടും. കഴിഞ്ഞ വർഷം മിശ്രിത രൂപത്തിലാക്കി കടത്താൻ ശ്രമിച്ച 144.41 കിലോഗ്രാം സ്വർണമാണ്​ പരിശോധനയിൽ പിടിച്ചത്​. ഇതിന്​ 69.65 കോടി രൂപ വില വരും. മറ്റു കേസുകളിലായി 55.63 കിലോയും പിടികൂടി. ഇതിന്​ 18.62 കോടി രൂപ വില വരും. 1.28 കോടിയുടെ വിദേശ കറൻസിയും 26.37 ലക്ഷത്തിന്‍റെ ഇന്ത്യൻ രൂപയും 28.94 ലക്ഷം രൂപ വില വരുന്ന ഒമ്പത്​ മൊബൈൽ ഫോണുകളും കസ്റ്റംസ്​ പിടികൂടി. കോവിഡിനിടെയിലും കഴിഞ്ഞ വർഷം കരിപ്പൂർ വഴി സ്വർണക്കടത്ത്​ വർധിച്ചതായി നേരത്തെ വ്യക്​തമാക്കിയിരുന്നു.