Begin typing your search above and press return to search.
exit_to_app
exit_to_app
Homechevron_rightNewschevron_rightLocal Newschevron_rightMalappuramchevron_rightഗ്രീൻഫീൽഡ്​ ഹൈവേ:...

ഗ്രീൻഫീൽഡ്​ ഹൈവേ: മൂന്ന്​ ജില്ലയിൽ ഏറ്റെടുക്കുന്നത്​ 547 ഹെക്ടർ ഭൂമി

text_fields
bookmark_border
blurb: 277.48 ഹെക്ടർ ഭൂമി ​ഏറ്റെടുക്കുന്ന പാലക്കാട്​ ജില്ലയിൽ ഈ മാസം​ 10ന്​ ഫീൽഡ്​ സർവേ തുടങ്ങും പാലക്കാട്​: കോഴിക്കോട്​-മലപ്പുറം-പാലക്കാട്​ ജില്ലകളെ ബന്ധിപ്പിച്ച്​ നിർമിക്കുന്ന ഗ്രീൻഫീൽഡ്​ ഹൈവേക്ക്​ മൂന്ന്​ ജില്ലയിൽനിന്നുമായി ആകെ ഏറ്റെടുക്കുക 547 ഹെക്ടർ ഭൂമി. കോഴിക്കോട്​ ജില്ലയിൽ ഫീൽഡ്​ സർവേ ഏറക്കുറെ പൂർത്തിയായി. പാലക്കാട്​ ജില്ലയിൽ ഈ മാസം​ 10ന്​ സർവേ ആരംഭിക്കും. സ്ഥലമെടുപ്പ്​ നടപടി പുരോഗമിക്കവേ, കിടപ്പാടവും കൃഷിയിടവും നഷ്ടപ്പെടുമെന്ന ആശങ്ക ജനങ്ങളിൽ ശക്തമാണ്​. കേന്ദ്ര സർക്കാറിന്‍റെ ഭാരത്​മാല പദ്ധതിയിൽ ഉൾപ്പെടുത്തി നിർമിക്കുന്ന ഗ്രീൻഫീൽഡ്​ ഹൈവേക്ക്​ മൂന്ന്​ ജില്ലയിലായി 121 കി.മീറ്ററാണ്​ ദൈർഘ്യം. 61.44 കി.മീ. പാലക്കാടും 52.96 കി.മീ. മലപ്പുറത്തും 6.60 കി.മീ. കോഴിക്കോട്ടും എന്നിങ്ങനെയാണിത്​. കോയമ്പത്തൂർ-പാലക്കാട്​ ദേശീയപാതയിലെ മരുതറോഡ്​ വില്ലേജ്​ ഭാഗത്തുനിന്ന്​ തുടങ്ങി കോഴിക്കോട്​ എൻ.എച്ച്​ 66ലെ പന്തീരാങ്കാവിലാണ്​ പാത അവസാനിക്കുന്നത്​. മൂന്ന്​ ജില്ലയിലുമായി 39 വില്ലേജിലൂടെയാണ്​ പാത കടന്നുപോകുന്നത്​. നിർമാണത്തിനും സ്ഥലമേറ്റെടുപ്പിനുമായി ആകെ വകയിരുത്തിയത്​ 8000 കോടി രൂപയാണ്​. സ്ഥലമേറ്റെടുപ്പിന്​ മുന്നോടിയായുള്ള ത്രീ എ വിജ്ഞാപനം ജൂൺ ആദ്യം പുറത്തിറക്കി. തുടർന്ന്​ ഇറക്കിയ ത്രീ സി വിജ്ഞാപനപ്രകാരമാണ്​ ഇപ്പോൾ സ്ഥലമുടമകളുടെ പരാതികളിൽ ഹിയറിങ്​​ നടക്കുന്നത്​. ഡ്രോൺ സർവേ പ്രകാരം റോഡിന്‍റെ അലൈൻമെന്‍റിൽ വ്യക്തതയില്ലാത്തത്​ ജനങ്ങളിൽ പരക്കെ ആശങ്ക സൃഷ്ടിച്ചിട്ടുണ്ട്​. ഇതുമൂലം ആരു​ടെയെല്ലാം വീടും സ്ഥലവും നഷ്ടപ്പെടുമെന്ന്​ കൃത്യമായി നിർണയിക്കാൻ കഴിഞ്ഞിട്ടില്ല. ഫീൽഡ്​ സർവേയിലൂടെ ഇതിൽ വ്യക്തത വരുമെന്ന്​ അധികൃതർ പറയുന്നു. അലൈൻമെന്റ് തയാറാക്കുന്നതിന്​ 25 ശതമാനം ഭൂമി അധികമായി രേഖപ്പെടുത്തിയാണ് ഏറ്റെടുക്കുന്ന സ്ഥലത്തിന്റെ അളവ് തിട്ടപ്പെടുത്തിയിരുന്നത്​. എന്നാൽ, പാത നിർമിക്കാൻ 45 മീറ്റർ വീതി കൃത്യമായി രേഖപ്പെടുത്തിയാണ്​ അളന്നെടുക്കുക. ഇതിനാൽ, ജൂൺ ആദ്യം പുറത്തുവന്ന ത്രീ എ വിജ്ഞാപനപ്രകാരം ഏറ്റെടുക്കാൻ ഉദ്ദേശിച്ചിരുന്ന (നോട്ടിഫൈഡ് ഏരിയ) സ്ഥലത്തിന്‍റെ അളവിൽ അൽപം കുറവുണ്ടാകും. ദേശീയപാത സ്ഥലമേറ്റെടുക്കുന്നതിന്​ നൽകുന്ന നഷ്ടപരിഹാര പാക്കേജ്​ തന്നെയായിരിക്കും ഈ ​പദ്ധതിക്കും അവലംബിക്കുക. ഭൂമിയേറ്റെടുത്തുകൊണ്ടുള്ള ത്രീ ഡി വിജ്ഞാപനം ഒക്​ടോബർ ആദ്യം ഉണ്ടാകും. പാലക്കാട്​ താലൂക്കിലെ മരുത റോഡിൽനിന്നാണ്​ 10ന്​ ഫീൽഡ്​ സർവേ ആരംഭിക്കുക. ഇതുസംബന്ധിച്ച്​ തിങ്കളാഴ്ച പാലക്കാട്ട്​ ഉന്നതതലയോഗം ചേരും. -സ്വന്തം ലേഖകൻ
Show Full Article
TAGS:
Next Story