'കതിർ 2022' സാ​ങ്കേതിക വിദ്യാവാരം

മലപ്പുറം: കർഷക സമൂഹത്തിന്‍റെ ശാക്തീകരണത്തിന്​ ഉപകരിക്കുന്ന നൂതന സാ​ങ്കേതിക വിദ്യകൾ പരിചയപ്പെടുത്താൻ മലപ്പുറം കൃഷി വിജ്ഞാന കേന്ദ്രം (കെ.വി.കെ) നബാർഡ്​, ആത്മ എന്നീ സ്ഥാപനങ്ങൾ സംയുക്തമായി ഫെബ്രുവരി 28 മുതൽ മാർച്ച്​ നാല്​ വരെ സംഘടിപ്പിക്കുന്നു. പരിപാടിയുടെ ഉദ്​ഘാടനം ഫെബ്രുവരി 28ന്​ തവനൂർ കെ.എം.സി.ടി ഓഡിറ്റോറിയത്തിൽ മന്ത്രി വി. അബ്​ദുറഹ്​മാൻ നിർവഹിക്കുമെന്ന്​ സംഘാടകർ വാർത്തസമ്മേളനത്തിൽ അറിയിച്ചു. ഡോ. കെ.ടി. ജലീൽ എം.എൽ.എ അധ്യക്ഷത വഹിക്കും. കെ.വി. കെയിൽ പുതുതായി ആരംഭിച്ച കർഷകരുടെ നൂതന കണ്ടുപിടിത്തങ്ങൾ പ്രദർശിപ്പിക്കുന്ന മ്യൂസിയത്തിന്‍റെ ഉദ്​ഘാടനവും പുതിയ ഉൽപന്നമായ സ്യൂഡൊണമസ്​ ലായനി​യുടെ വിതരണോദ്​ഘാടനവും പോഷക തോട്ട കിറ്റ്​ വിതരണവും നടക്കും. നാലുദിവസങ്ങളിലായി സാ​ങ്കേതികവിദ്യ പ്രദർശനം, കർഷക ശാസ്ത്രജ്ഞ മുഖാമുഖം, ശാസ്ത്രീയ നെൽകൃഷി, ഹോർട്ടികൾചറൽ വിളകളുടെ സംസ്കരണ രീതികൾ, മൃഗപരിപാലന മേഖലയിലെ ജൈവ മാലിന്യ സംസ്കരണം, മൂല്യവർധന സാധ്യതകൾ, മാംസോൽപാദക മൃഗങ്ങളുടെ പരിപാലനം, ഹൈടെക്​ പച്ചക്കറി കൃഷി, കാർഷിക യന്ത്രവത്കരണം, കൃത്യത കൃഷി എന്നീ വിഷയങ്ങളിൽ സെമിനാർ നടക്കും. അതത്​ വിഷയങ്ങളിൽ വിദഗ്​ധർ സംബന്ധിക്കും. സമാപന സമ്മേളനം 28ന്​ വൈകീട്ട് മൂന്നിന്​ ജില്ല പഞ്ചായത്ത്​ പ്രസിഡന്‍റ്​ എം.കെ. റഫീഖ ഉദ്​ഘാടനം ചെയ്യും. വാർത്തസമ്മേളനത്തിൽ കെ.വി.കെ മലപ്പുറം പ്രോഗ്രാം കോഓഡിനേറ്റർ സി. ഇബ്രാഹിം കുട്ടി, അസി. പ്രഫസർ പി.കെ. അബ്​ദുൽ ജബ്ബാർ, ആത്മ പ്രോജക്ട്​ ഡയറക്ടർ കെ. ചന്ദ്രൻ, അസി. പ്രഫ. ഡോ. വി.വി. ലിലിയ എന്നിവർ സംബന്ധിച്ചു.