'ഇ.എം.എസിന്‍റെ ലോകം' ദേശീയ സെമിനാർ 12 മുതൽ പുത്തനത്താണിയിൽ

മലപ്പുറം: ഇ.എം.എസ്​ പഠനകേന്ദ്രം സംഘടിപ്പിക്കുന്ന 'ഇ.എം.എസിന്‍റെ ലോകം' 24ാമത്​ ദേശീയ സെമിനാർ ഈ മാസം 12, 13 തീയതികളിൽ നടക്കുമെന്ന്​ സംഘാടകർ വാർത്തസമ്മേളനത്തിൽ അറിയിച്ചു. പുത്തനത്താണി സി.വി ഓഡിറ്റോറിയത്തിൽ നടക്കു​ന്ന സെമിനാറിന്‍റെ ഉദ്​ഘാടനം 12ന്​ രാവിലെ 10ന്​ മുഖ്യമന്ത്രി പിണറായി വിജയൻ നിർവഹിക്കും. ഇ.എം.എസ്​ സ്മാരകപ്രഭാഷണം ഡോ. സുനിൽ പി. ഇളയിടം നിർവഹിക്കും. 'ദേശീയത, ഫെഡറലിസം, മതനിരപേക്ഷത' ആണ്​ ഈ വർഷത്തെ വിഷയം. ഉച്ചക്ക്​ രണ്ടിന്​ നടക്കുന്ന സെമിനാറിൽ വിവിധ വിഷയങ്ങളിൽ സി.പി.എം പോളിറ്റ്​ബ്യൂറോ അംഗങ്ങളായ പ്രകാശ്​ കാരാട്ട്​, എം.എ. ബേബി, കേന്ദ്ര കമ്മിറ്റി അംഗം ഡോ. തോമസ്​ ഐസക്​, മന്ത്രി ആർ. ബിന്ദു തുടങ്ങിയവർ സംസാരിക്കും. വൈകീട്ട്​ ആറിന്​ നടക്കുന്ന സാംസ്കാരിക സായാഹ്നത്തിൽ സംവിധായകൻ ആഷിഖ്​ അബു സംബന്ധിക്കും. 13ന്​ അനുസ്മരണ പ്രഭാഷണം സ്പീക്കർ എം.ബി. രാജേഷ്​ നിർവഹിക്കും. രണ്ടാംദിവസം ​പോളിറ്റ്​ബ്യൂറോ അംഗം എ. വിജയരാഘവൻ, മ​ന്ത്രി പി. രാജീവ്​, എം. സ്വരാജ്​, എളമരം കരീം, കെ.ഇ.എൻ തുടങ്ങിയവർ വിവിധ സെഷനുകളിൽ സംസാരിക്കും. വൈകീട്ട്​ അഞ്ചിന്​ നടക്കുന്ന സമാപന സമ്മേളനം പി.ബി അംഗം വൃന്ദ കാരാട്ട്​ ഉദ്​ഘാടനം ചെയ്യും. കെ.ടി. ജലീൽ എം.എൽ.എ അധ്യക്ഷത വഹിക്കും. വാർത്തസമ്മേളനത്തിൽ പഠനഗവേഷണ ട്രസ്റ്റ്​ സെക്രട്ടറി ഇ.എൻ. മോഹൻദാസ്​, സംഘാടകസമിതി ജനറൽ കൺവീനർ വി.പി. സഖറിയ, കെ.പി. ശങ്കരൻ, വി.കെ. രാജീവ്​ തുടങ്ങിയവർ സംബന്ധിച്ചു.