കരിപ്പൂർ: കൂടുതൽ ആഭ്യന്തര സർവിസുകൾക്ക് ശ്രമം -ഡയറക്​ടർ

കരിപ്പൂർ: കോഴിക്കോട്​ വിമാനത്താവളത്തിൽനിന്ന്​ ഒരുവർഷത്തിനകം കൂടുതൽ ആഭ്യന്തര സർവിസുകൾ ആരംഭിക്കാൻ ശ്രമിക്കുമെന്ന്​ വിമാനത്താവള ഡയറക്ടർ എസ്​. സുരേഷ്​. ചുമതല ഏറ്റെടുത്ത​ ശേഷം സംസാരിക്കുകയായിരുന്നു അദ്ദേഹം. നിലവിൽ ബംഗളൂരു അടക്കമുള്ള നഗരങ്ങളിലേക്ക്​ ഒരു സർവിസാണുള്ളത്​. ഇവ വർധിപ്പിക്കാനും കൂടാതെ, കൊൽക്കത്ത അടക്കമുള്ള പ്രധാന നഗരങ്ങളിലേക്ക്​ സർവിസിനായും ശ്രമിക്കുമെന്ന്​ അദ്ദേഹം വ്യക്തമാക്കി. തിരുപ്പതിയിൽ ചുമതല ഏ​ൽക്കു​മ്പോൾ ഏഴ്​ ആഭ്യന്തര സർവിസുകൾ മാത്രമായിരുന്നു. സ്ഥലം മാറു​മ്പോൾ 24 സർവിസായി വർധിപ്പിച്ചു​. സമാനമായി കരിപ്പൂരിലും സർവിസുകൾ വർധിപ്പിക്കാൻ ശ്രമിക്കും. ഇതിനായി വിമാനകമ്പനികളുമായും വ്യോമയാന മന്ത്രാലയവുമായും ബന്ധപ്പെടും. ആഭ്യന്തര സർവിസുകൾ വരുന്നതോടെ വിവിധ നഗരങ്ങളുമായി കണക്​ടിവിറ്റി ലഭിക്കും. ഇതിനൊപ്പം രാജ്യാന്തര സർവിസുകളും തുടങ്ങേണ്ടതുണ്ട്​. കരിപ്പൂരിൽനിന്ന്​ വലിയ വിമാന സർവിസുകൾ പുനരാരംഭിക്കാൻ പരമാവധി ശ്രമിക്കുമെന്നും അദ്ദേഹം വ്യക്തമാക്കി. ഇപ്പോൾ പരിഗണനയിലുള്ള പ്രവൃത്തി പൂർത്തിയായാൽ സർവിസ്​ ആരംഭിക്കാൻ സാധിക്കുമെന്നാണ്​ കരുതുന്നത്​. ഏപ്രൺ വികസനവും പരിഗണനയിലുണ്ട്​. ഭൂമി ലഭ്യമായാൽ ഉടൻ വികസന പ്രവൃത്തികൾ ആരംഭിക്കും. റൺവേ എൻഡ്​ സേഫ്​റ്റി ഏ​രിയ (റെസ) ദീർഘിപ്പിക്കുന്നതിനൊപ്പം റൺവേ റീ കാർപ്പറ്റിങ്ങും സെന്‍റർ ലൈൻ സ്ഥാപിക്കലും പൂർത്തിയാക്കും. ഭൂമി ഏറ്റെടുക്കലുമായി ബന്ധപ്പെട്ട വിഷയത്തിൽ അടുത്തയാഴ്ച മലപ്പുറം കലക്​ടറുമായി കൂടിക്കാഴ്​ച നടത്തും. വികസനവുമായി ബന്ധപ്പെട്ട വിഷയങ്ങൾ വിശദീകരിക്കും. ജനപ്രതിനിധികളുടെയും പരിസരവാസികളുടെയും സഹകരണത്തോടെ വികസന പ്രവർത്തനങ്ങൾ പൂർത്തീകരിക്കാനാണ്​ ശ്രമം. വികസനം പൂർത്തിയാകണമെങ്കിൽ ഭൂമി ആവശ്യമാണ്​. മഴക്കാലത്ത്​ കരിപ്പൂരിൽനിന്ന്​ വെള്ളം പുറത്തേക്ക്​ പോകുന്ന പ്രശ്​നം പരിഹരിക്കാൻ ഡ്രെയിനേജ്​ സംവിധാനം ഒരുക്കുന്നുണ്ടെന്നും ഡയറക്ടർ വ്യക്തമാക്കി.