ഹോവിങ്സ്, അറബിക്​ കോളജിൽ നിന്നൊരു വനിത ഐ.ടി കമ്പനി

ഹോവിങ്സ്, അറബിക്​ കോളജിൽനിന്നൊരു വനിത ഐ.ടി കമ്പനി എടവണ്ണ: ഐ.ടി മേഖലയിൽ പറന്നുയരാൻ ചിറകുകൾ തുന്നി അറബിക്​ കോളജിൽനിന്നൊരു പെൺകൂട്ടായ്മ. സ്റ്റാർട്ടപ് എക്കോസിസ്റ്റം നിർമിക്കുന്ന ടാൽറോപ് കമ്പനിയിലൂടെ എടവണ്ണ ജാമിഅ നദ്‌വിയ്യ വിമൻസ് അറബിക് കോളജ്​ വിദ്യാർഥിനികളാണ്​ 'ഹോവിങ്സ്' എന്നു പേരിട്ട ഐ​.ടി കമ്പനിക്ക്​ രൂപംനൽകിയത്​. സ്റ്റാർട്ടപ് എക്കോസിസ്റ്റം വികസിപ്പിക്കുന്നതിന്‍റെ ഭാഗമായി ഓരോ നിയോജക മണ്ഡലത്തിലും 'ടെക്കീസ് പാർക്ക്' ടാൽറോപ്പിന്‍റെ ഐ.ടി പാർക്ക് പദ്ധതി 2018ൽ ഏറനാട് നിയോജക മണ്ഡലത്തിൽ ജാമിഅ നദ്‌വിയ്യ കോളജിൽ ആരംഭിച്ചിരുന്നു. ഇതിനു കീഴിലെ ടെക്​നോളജി സ്കൂളിലും സ്റ്റാർട്ടപ് സ്കൂളിലും പങ്കെടുക്കാൻ അവസരം ലഭിച്ചതാണ് പെൺകുട്ടികൾക്ക് ഗുണകരമായത്. ഐ.ടി പഠനം അധ്യയനത്തിന്‍റെ ഭാഗമല്ലാത്ത വിദ്യാർഥിനികൾ ഐ.ടി കമ്പനിയിലേക്ക് ചുവടുവെക്കുന്നത് കോളജിലെ മറ്റു വിദ്യാർഥികൾക്കും അധ്യാപകർക്കും ആവേശം പകർന്നിട്ടുണ്ട്​​. കോളജിലെ പഠനകാര്യങ്ങൾ കഴിഞ്ഞു ലഭിച്ച കുറഞ്ഞ സമയം ചെലവഴിച്ചാണ് ഈ പെൺകൂട്ടം തങ്ങളുടെ സ്വപ്നം യാഥാർഥ്യമാക്കിയത്. കമ്പനി ആരംഭിച്ച്​ കുറഞ്ഞ സമയത്തിനുള്ളിൽ കോളജ്​ ആവശ്യങ്ങൾക്ക് രണ്ട് വെബ്സൈറ്റുകൾ ഇതിനകം നിർമിച്ചു നൽകിയതായി ഹോവിങ്സ് അംഗമായ ജാമിഅയിലെ മൂന്നാം വർഷ ബിരുദ വിദ്യാർഥിനി കൊല്ലം സ്വദേശി മുഹ്സിന പറഞ്ഞു. കമ്പനി വളരുന്നതോടെ ഞങ്ങളെപ്പോലെ നിരവധി പേർക്ക്​ ജോലി ലഭിക്കുമെന്നും അവർ പറഞ്ഞു. കൂടുതൽ സംരംഭകരെയും എൻജിനീയർമാരെയും വാർത്തെടുക്കാൻ വിദ്യാലയങ്ങളിൽ ടെക്​നോളജി സ്കൂളും സ്റ്റാർട്ടപ് സ്കൂളും നടപ്പാക്കുന്ന പ്രവർത്തനത്തിലാണ് ടാൽറോപ്പെന്ന് സി.ഒ സഫീർ നജ്മുദ്ദീൻ പറഞ്ഞു. ഫോട്ടോ: MN EDAV IT COMPANY NEWS എടവണ്ണ ജാമിഅ നദ്‌വിയ്യ വിമൻസ് അറബിക് കോളജിലെ ടാൽറോപ് ടെക്കീസ് പാർക്കിലെ 'ഹോവിങ്സ്' ഐ.ടി കമ്പനി അംഗങ്ങൾ