ഹജ്ജ് സാങ്കേതിക പഠന ക്ലാസ് ഉദ്ഘാടനം

താനൂർ: സംസ്ഥാന ഹജ്ജ് കമ്മിറ്റി വഴി ഈ വർഷം ഹജ്ജിന് യാത്രയാകുന്നവർക്ക് സംസ്ഥാന ഹജ്ജ് കമ്മിറ്റി നൽകുന്ന സാങ്കേതിക പഠന ക്ലാസിന്റെ സംസ്ഥാനതല ഉദ്ഘാടനം വ്യാഴാഴ്ച രാവിലെ ഒമ്പതിന്​ താനൂർ ഒലിവ് ഓഡിറ്റോറിയത്തിൽ മന്ത്രി വി. അബ്ദുറഹിമാൻ ഉദ്ഘാടനം ചെയ്യും. ചടങ്ങിൽ സംസ്ഥാന ഹജ്ജ്​ കമ്മിറ്റി ചെയർമാനും കേന്ദ്ര ഹജ്ജ് കമ്മിറ്റി മെംബറുമായ സി. മുഹമ്മദ് ഫൈസി അധ്യക്ഷനായിരിക്കും. താനൂർ, തിരൂർ നിയോജകമണ്ഡലങ്ങളിൽനിന്ന് തെരഞ്ഞെടുക്കപ്പെട്ട 296 അപേക്ഷകരും അതോടൊപ്പം വെയിറ്റിങ്​ ലിസ്റ്റ് 500ൽ ഉൾപ്പെടുന്ന 30 പേരും ഉൾപ്പെടെ 326 പേർ താനൂരിൽ നടക്കുന്ന സാങ്കേതിക പഠന ക്ലാസിൽ സംബന്ധിക്കും. സംസ്ഥാന ഹജ്ജ് കമ്മിറ്റി നിയോഗിച്ച ട്രെയ്​നർമാർ ഓരോ ഹജ്ജ് അപേക്ഷകനെയും നേരിട്ട് ബന്ധപ്പെട്ടാണ് ക്ലാസിലേക്ക് ക്ഷണിക്കുന്നത്. വാർത്തസമ്മേളനത്തിൽ സംസ്ഥാന ഹജ്ജ് കമ്മിറ്റി മെംബർ പി.ടി. അക്ബർ, കെ.പി. നിസാർ, ഹജ്ജ് വളന്‍റിയർ കരീം വൈലത്തൂർ, അബ്ദുൽ ലത്തീഫ്, പി.കെ. മൊയ്തീൻ കുട്ടി എന്നിവർ പങ്കെടുത്തു. കൂടുതൽ വിവരങ്ങൾക്ക്: 9995414363, 9446022514