വൈദ്യുതി ടവര്‍ വീണ് അന്തർസംസ്ഥാന തൊഴിലാളി മരിച്ചു

ഒരാളുടെ നില ഗുരുതരം ഇരിങ്ങാലക്കുട: ഉപയോഗശൂന്യമായ വൈദ്യുതി ടവര്‍ ദേഹത്ത്​ വീണ് അന്തർസംസ്ഥാന തൊഴിലാളി മരിച്ചു. ഒരാൾക്ക്​ ഗുരുതര പരിക്കേറ്റു. ഞായറാഴ്ച രാവിലെ 11.30ഓടെ വെള്ളാനി കല്ലട വീട്ടില്‍ ബാലന്റെ പറമ്പിലെ ടവര്‍ അഴിച്ചുമാറ്റുന്നതിനിടെയാണ് അപകടം. അസം രഥപൂര്‍ സ്വദേശി ഇസാക്​ കുജൂറാണ്​ (25) മരിച്ചത്. ടവറിനു മുകളില്‍ കയറിയ അസം സ്വദേശികളായ ഇസാകിന്‍റെയും ജോസഫിന്‍റെയും ദേഹത്ത്​ ടവര്‍ മറിഞ്ഞ് വീഴുകയായിരുന്നു. ടവറിനടിയില്‍ കുടുങ്ങിയ ഇരുവരെയും നാട്ടുകാര്‍ പുറത്തെടുത്ത് ആദ്യം ഇരിങ്ങാലക്കുട ജനറല്‍ ആശുപത്രിയിലും പിന്നീട് തൃശൂര്‍ മെഡിക്കല്‍ കോളജിലും പ്രവേശിപ്പിച്ചെങ്കിലും ഇസാക്​ മരിക്കുകയായിരുന്നു. കാട്ടൂര്‍ പൊലീസും ഇരിങ്ങാലക്കുടയില്‍നിന്ന്​ അഗ്​നിരക്ഷ സേനയും സ്ഥലത്തെത്തിയിരുന്നു. ടവറിന്റെ തൂണുകളുടെ അടിവശം തുരുമ്പെടുത്ത നിലയിലായിരുന്നു. മാടക്കത്തറയില്‍നിന്ന്​ വെള്ളാനി പവര്‍ഹൗസിലേക്ക് വൈദ്യുതി പ്രവഹിച്ചിരുന്ന ലൈനായിരുന്നു ഈ ടവറിലുണ്ടായിരുന്നത്. 60 വര്‍ഷത്തോളം പഴക്കമുണ്ട്. അഞ്ചു വര്‍ഷം മുമ്പ് 110 കെവി ആക്കിയപ്പോള്‍ സമീപത്ത് മറ്റൊരു ടവര്‍ സ്ഥാപിച്ച് അതിലൂടെയാണ് വൈദ്യുതി പ്രവഹിപ്പിച്ചിരുന്നത്. ഇതോടെ ഈ ടവര്‍ ഉപയോഗശൂന്യമാവുകയായിരുന്നു. ഇത്​ അഴിച്ചുമാറ്റാന്‍ കെ.എസ്.ഇ.ബിയാണ്​ കരാര്‍ നല്‍കിയത്​. മൃതദേഹം തൃശൂര്‍ മെഡിക്കല്‍ കോളജ്​ ആശുപത്രിയില്‍. tcm ijk ഇസാക്​ കുജൂര്‍ (25)