തിരൂർ നഗരത്തിലെ ഗതാഗത കുരുക്കിന്​ അവസാനമില്ല

കുരുക്കഴിയാതെ തിരൂർ നഗരം പലപ്പോഴും ഗതാഗത കുരുക്ക്​ മണിക്കൂറുകൾ നീളുന്നു തിരൂർ: തിരൂർ നഗരത്തിൽ ഗതാഗത കുരുക്ക് രൂക്ഷമാവുന്നു. താഴെപ്പാലം, സിറ്റി ജങ്​ഷൻ, പൂങ്ങോട്ടുകുളം എന്നിവിടങ്ങളിലാണ് ഗതാഗത കുരുക്ക് തുടർകഥയാവുന്നത്. ഇതുമൂലം മണിക്കൂറുകളോളം കുടുങ്ങി കിടക്കേണ്ട ഗതികേടിലാണ് യാത്രക്കാർ. രാവി​ലെ മുതൽ തന്നെ ഗതാഗത കുരുക്ക്​ തുടങ്ങുകയാണ്​. ട്രാഫിക്ക് പൊലീസിന്റെ ഇടപെടലാണ് ഒരു പരിധി വരെ ആശ്വാസം നൽകുന്നത്. താഴെപ്പാലം, സിറ്റി ജങ്​ഷൻ എന്നിവിടങ്ങളിലെ പുതിയ മേൽപാലങ്ങൾ തുറക്കുന്നതോടെ നഗരത്തിലെ ഗതാഗത കുരുക്കിന് ഒരുപരിധി വരെ പരിഹാരമാവും. നിലവിൽ താഴെപ്പാലം പുതിയ പാലത്തിന്റെ അപ്രോച്ച് റോഡ് പ്രവൃത്തികൾ നടന്നുകൊണ്ടിരിക്കുകയാണ്. ഇത് പൂർത്തിയായാലുടൻ ഗതാഗതത്തിനായി തുറക്കും. സിറ്റി ജങ്​ഷൻ റെയിൽവേ ഓവർ ബ്രിഡ്ജ് അപ്രോച്ച് റോഡിന്റെ പ്രവൃത്തി ഉടൻ ആരംഭിക്കുമെന്നാണ് ബന്ധപ്പെട്ടവർ നൽകുന്ന വിശദീകരണം. കൂടാതെ, തിരൂർ-ചമ്രവട്ടം റോഡിൽ താഴെപ്പാലത്ത് ഗതാഗത കുരുക്കിന് ശാശ്വത പരിഹാരം കണ്ടെത്തുന്ന പുതിയ പദ്ധതിക്ക് സർക്കാർ അനുമതി നൽകിയിരുന്നു. സെന്‍റ്​ മേരിസ് പള്ളി മുതൽ രാജിവ് ഗാന്ധി മുനിസിപ്പൽ സ്റ്റേഡിയം വരെയാണ് പുതിയ മേൽപാലത്തിന് അനുമതി. ഇതിനായി 44 കോടി രൂപ അനുവദിച്ച് ഉത്തരവായതായി കുറുക്കോളി മൊയ്തീൻ എം.എൽ.എ അറിയിച്ചിരുന്നു. ഇതോടൊപ്പം അനിശ്ചിതത്വത്തിലായ പൊൻമുണ്ടം-പൊലീസ് ലൈൻ പദ്ധതി കൂടി യാഥാർഥ്യമാക്കാനായാൽ തിരൂർ നഗരത്തിലെ ഗതാഗതക്കുരുക്കിന് പരിഹാരമാവും.