വീടുകളിലേക്ക്​ അതിവേഗ ഇന്‍റർനെറ്റ്​; ജിയോ പദ്ധതി വ്യാപിപ്പിക്കുന്നു

മലപ്പുറം: വീടുകളിലേക്ക്​ വൈഫൈ സൗകര്യവും അതിവേഗ ഇന്‍റർനെറ്റും എത്തിക്കാൻ ജില്ലയിലും വിപുല പദ്ധതികളുമായി റിലയൻസ്​ ജിയോ​ നെറ്റ്​വർക്. ഇതിന്‍റെ ഭാഗമായി നഗരസഭ പരിധികളിലെ റോഡുകളിൽ തൂണുകൾ സ്ഥാപിക്കുന്ന ജോലി തകൃതിയാണ്. പലയിടങ്ങളിലും നിർമാണം പൂർത്തിയായി. മറ്റിടങ്ങളിൽ അതിവേഗം തുടരുന്നു. ബി.എസ്​.എൻ.എൽ ലാൻഡ്​​ ഫോണുകൾക്ക്​ വേണ്ടി​ സ്ഥാപിച്ച തൂണുകളുടെ മാതൃകയിലാണ്​ ഗ്രാമങ്ങളിൽ പോലും ഇവ സ്ഥാപിക്കുന്നത്​. 45 ലക്ഷം രൂപയാണ്​ ഇതിനായി ജിയോ കമ്പനി ഓരോ നഗരസഭകളിലും കെട്ടിവെക്കുന്നത്​. ഇതിൽ 41.8 ലക്ഷം രൂപ തൂണുകൾ സ്ഥാപിച്ച റോഡുകളുടെ അറ്റകുറ്റപ്പണിക്കാണ്​. ബാക്കി തുക തൂണുകൾ സ്ഥാപിക്കുന്നതിന്​ ഫീസും​. കോവിഡിൽ ക്ലാസുകളും കമ്പനികളുടെ യോഗങ്ങളും മറ്റും ഓൺലൈനിലേക്ക്​ മാറിയതോടെയാണ്​ അതിവേഗ ഇന്‍റർനെറ്റിനും വൈഫൈ കണക്ഷനുകൾക്കും ആവശ്യക്കാരേറിയത്​.