കേന്ദ്ര സംഘം വാഴക്കാട് കുടുംബാരോഗ്യ കേന്ദ്രം സന്ദർശിച്ചു

വാഴക്കാട്: വെള്ളപ്പൊക്കത്തെ അതിജീവിക്കുന്ന നിർമാണരീതിയും പരിസ്ഥിതി സൗഹൃദ അന്തരീക്ഷവും നിമിത്തം ഇതിനകം ശ്രദ്ധനേടിയ വാഴക്കാട് കുടുംബാരോഗ്യ കേന്ദ്രം സന്ദർശിക്കാൻ കേന്ദ്ര വിദഗ്​ധ സംഘം വാഴക്കാട്ടെത്തി. ഇന്ത്യയിലെ 20 സംസ്ഥാനങ്ങളിൽനിന്നുള്ള ഉന്നത ഉദ്യോഗസ്ഥരടക്കം സംഘമാണ് കുടുംബാരോഗ്യ കേന്ദ്രത്തിന്‍റെ നിർമിതിയും പ്രവർത്തനരീതിയും നേരിട്ട് മനസ്സിലാക്കാനാണ്​ വാഴക്കാട്ടെത്തിയത്. ഐ.എ.എസ് ഉദ്യോഗസ്ഥർ, പ്രഗല്​ഭ ഡോക്ടർമാർ, മെഡിക്കൽ സംഘം എന്നിവരടങ്ങിയ സംഘം കുടുംബാരോഗ്യ കേന്ദ്രത്തിന്‍റെ കെട്ടിട നിർമാണവും സൗകര്യങ്ങളും പരിശോധിച്ച്​ റിപ്പോർട്ട്​ തയാറാക്കി. ഇന്ത്യയിലെ മറ്റ് പ്രാഥമികാരോഗ്യ കേന്ദ്രങ്ങളും ഇതേ മാതൃകയിൽ മാറ്റാനും സൗകര്യങ്ങൾ വർധിപ്പിക്കാനും സംഘം കേന്ദ്ര സർക്കാറിനോട് ശിപാർശ ചെയ്യും. ജില്ല മെഡിക്കൽ ഓഫിസർ രേണുക, ഡി.പി.എം അനൂപ്, മെഡിക്കൽ ഓഫിസർ ഡോ. ബൈജു, വാഴക്കാട് ഗ്രാമപഞ്ചായത്ത് പ്രസിഡന്‍റ്​ മലയിൽ അബ്ദുറഹ്മാൻ, ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ സി.വി. സക്കറിയ, വികസന സ്റ്റാൻഡിങ് കമ്മിറ്റി ചെയർമാൻ റഫീഖ് അഫ്സൽ, വൈസ് പ്രസിഡന്‍റ്​ പി.ടി. വസന്തകുമാരി, ക്ഷേമകാര്യ കമ്മിറ്റി ചെയർപേഴ്സൻ ആയിഷ മാരാത്ത്, അഡ്വ. എം.കെ.സി. നൗഷാദ് എന്നിവർ സംഘത്തെ അനുഗമിച്ചു. ചിത്രം: me vazhakkad കേന്ദ്ര വിദഗ്​ധ സംഘം വാഴക്കാട് കുടുംബാരോഗ്യ കേന്ദ്രം സന്ദർശിക്കുന്നു