പദ്ധതി നിര്‍വഹണം: നുറ്​ ശതമാനം ചെലവഴിച്ച് പൊന്നാനി ബ്ലോക്ക് പഞ്ചായത്ത്

നൂറ്​ ശതമാനം ചെലവഴിച്ച് പൊന്നാനി ബ്ലോക്ക് പഞ്ചായത്ത് എടപ്പാൾ: 2021-22ലെ വാര്‍ഷിക പദ്ധതി നിര്‍വഹണത്തില്‍ നൂറ്​ ശതമാനം തുകയും ചെലവഴിച്ച് ജില്ലയിലെ ബ്ലോക്ക് പഞ്ചായത്തുകളില്‍ പൊന്നാനി ഒന്നാമതെത്തി. 3.71 കോടി രൂപയുടെ പദ്ധതി ആവിഷ്കരിച്ചതില്‍ മുന്‍വര്‍ഷത്തെ ബാക്കി ഉള്‍പ്പെടെ ഉള്‍പ്പെടെ 3.85 കോടി ചെലവഴിച്ചതായി ബ്ലോക്ക് പഞ്ചായത്ത് പ്രസിഡന്‍റ് സി. രാമകൃഷ്ണന്‍ അറിയിച്ചു. ഭവന പദ്ധതികള്‍, ആധുനിക കുടിവെള്ള സജ്ജീകരണം, മാലിന്യ സംസ്കരണ സംവിധാനങ്ങള്‍, വിവിധ പട്ടികജാതി ക്ഷേമ പ്രവര്‍ത്തനങ്ങള്‍, നെല്‍കൃഷി വികസന പദ്ധതി, ക്ഷീര മേഖലയിലെ പദ്ധതികള്‍, എടപ്പാള്‍, തൃക്കണാപുരം സി.എച്ച്.സികളിലെ വികസനം തുടങ്ങിയ പദ്ധതികളാണ് ഈ വര്‍ഷം നടപ്പാക്കിയത്. നേട്ടം കൈവരിച്ച ഉദ്യോഗസ്ഥരെ പൊന്നാനി ബ്ലോക്ക് പഞ്ചായത്ത് ഭരണസമിതി അനുമോദിച്ചു. ചടങ്ങിൽ പ്രസിഡന്റ് സി. രാമകൃഷ്ണൻ, വൈസ് പ്രസിഡന്‍റ്​ ആർ. ഗായത്രി, സെക്രട്ടറി സി.ആർ. രാജീവ്, അസി. എക്സിക്യൂട്ടിവ് എൻജിനീയർ എൻ. സുധ, അസി. കൃഷി ഡയറക്ടർ സി. മിനി, ക്ഷീര വികസന ഓഫിസർ മുഹമ്മദ് നസീം, പട്ടികജാതി വികസന ഓഫിസർ പി.എം. ബിജു തുടങ്ങിയവർ സംസാരിച്ചു.