വെളപ്പായ പാലത്തിലെ ടോൾ പിരിവ്​ നിർത്തൽ പൊതുമരാമത്ത്​ വകുപ്പിന്‍റെ പരിഗണനയിൽ

മുളങ്കുന്നത്തുകാവ്​: വെളപ്പായ-മെഡിക്കൽ കോളജ്​ റെയിൽവേ മേൽപാലത്തിലെ ടോൾ പിരിവ്​ അവസാനിപ്പിക്കുന്ന കാര്യം പൊതുമരാമത്ത്​ വകുപ്പിന്‍റെ പരിഗണനയിൽ. ടോൾ പിരിവ്​ നിർത്തണമെന്ന്​ ആവശ്യപ്പെട്ട്​ ബെന്നി ബഹനാൻ എം.പി നൽകിയ കത്തിനുള്ള മറുപടിയിൽ മുഖ്യമന്ത്രി പിണറായി വിജയനാണ്​ ഇക്കാര്യം അറിയിച്ചത്​. ഉചിതമായ തീരുമാനം എടുക്കാൻ കത്ത്​ പൊതുമരാമത്ത്​ വകുപ്പ്​ സെക്രട്ടറിക്ക്​ കൈമാറിയിട്ടുണ്ടെന്നാണ്​ മുഖ്യമന്ത്രി അറിയിച്ചത്​. ജില്ലക്കകത്തുനിന്നും പാലക്കാട്​, മലപ്പുറം, എറണാകുളം ജില്ലകളിൽനിന്നും നിരവധി രോഗികൾ ചികിത്സ തേടി മുളങ്കുന്നത്തുകാവ്​ ഗവ. മെഡിക്കൽ കോളജിൽ എത്തുന്നുണ്ട്​. ഇവരിൽ അധികം പേരും മേൽപാലം വഴിയാണ്​ പോകുന്നത്​. വർഷങ്ങളായി യാത്രക്കാരിൽനിന്ന്​ ഇവിടെ ടോൾ പിരിക്കുന്നുണ്ട്​. മാത്രമല്ല, ആംബുലൻസ്​ ഉൾപ്പെടെ പല വാഹനങ്ങളും ഇവിടെ ഗതാഗത കുരുക്കിൽ ഏറെനേരം അകപ്പെടാറുമുണ്ട്​. ഇതെല്ലാം പരിഗണിച്ച്​ വർഷങ്ങളായി തുടരുന്ന ടോൾ പിരിവ്​ അവസാനിപ്പിക്കണമെന്ന്​ ആവശ്യപ്പെട്ടാണ്​ മുഖ്യമന്ത്രിക്ക്​ ബെന്നി ബഹനാൻ എം.പി കത്ത്​ നൽകിയത്​.