ജനക്ഷേമ പദ്ധതികളുമായി പഴയന്നൂർ ബ്ലോക്ക് പഞ്ചായത്ത്​ ബജറ്റ്

ജനക്ഷേമ പദ്ധതികളുമായി പഴയന്നൂർ ബ്ലോക്ക് പഞ്ചായത്ത്​ ബജറ്റ് പഴയന്നൂർ: ജനക്ഷേമ പദ്ധതികൾക്ക്​ ഊന്നൽ നൽകി പഴയന്നൂർ ബ്ലോക്ക് പഞ്ചായത്ത് ബജറ്റ്. 38.32 കോടി രൂപ വരവും 38.16 കോടി ചെലവും 16.30 ലക്ഷം നീക്കിയിരിപ്പും പ്രതീക്ഷിക്കുന്ന ബജറ്റാണ്​ വൈസ് പ്രസിഡന്‍റ്​ പി. പ്രശാന്തി അവതരിപ്പിച്ചത്​. പാവപ്പെട്ടവരുടെ ഭവന നിർമാണത്തിനായി 2.75 കോടിയും കാർഷിക മേഖലയിൽ തൊഴിലുറപ്പ് പദ്ധതിയുടെ സാധ്യതകൾ കൂടി ഉൾപ്പെടുത്തി 18 കോടിയും ആരോഗ്യ മേഖല ശക്തിപ്പെടുത്താൻ രണ്ട്​ കോടിയും വനിത ക്ഷേമത്തിനായി ഒരുകോടിയും അടിസ്ഥാന സൗകര്യ വികസനത്തിനായി 1.35 കോടിയുമടക്കം അനുവദിച്ചിട്ടുണ്ട്​. പഞ്ചായത്തിലെ ടൂറിസം സാധ്യത ഉൾക്കൊണ്ട് കാർഷിക ടൂറിസം, തീർഥാടന ടൂറിസം, സിനിമ ഷൂട്ടിങ്​ ലൊക്കേഷനുകൾ എന്നിങ്ങനെ പ്രാദേശിക ടൂറിസം പദ്ധതികൾ ആവിഷ്കരിക്കും. ബ്ലോക്ക് പരിധിയിലെ പ്രകൃതിരമണീയമായ പ്രദേശങ്ങളെ ഉൾപ്പെടുത്തി ടൂറിസം ഇടനാഴി ഈ പഞ്ചവത്സര പദ്ധതിയിൽ യാഥാർഥ്യമാക്കുമെന്ന് ബജറ്റിൽ പറയുന്നു. പഞ്ചായത്ത് പ്രസിഡന്‍റ്​ എം.കെ. അഷറഫ്, അധ്യക്ഷന്മാരായ കെ.പി. ശ്രീജയൻ, അരുൺ കാളിയത്ത്, എം.വി. സുചിത്ര, ബ്ലോക്ക് ജനപ്രതിനിധികളായ പി.എ. അനീഷ്, ഗീത, ഷിജിത സൂസൻ അലക്സ്, പഞ്ചായത്ത് പ്രസിഡന്‍റുമാരായ വി. തങ്കമ്മ, കെ. ശശിധരൻ, ബി.ഡി.ഒ എ. ഗണേഷ് എന്നിവർ സംസാരിച്ചു.