പുൽപറ്റ പഞ്ചായത്തിനുള്ള ബജറ്റ് വിഹിതം കുറച്ചു; വികസന പ്രവർത്തനങ്ങളെ ബാധിക്കുമെന്ന് പ്രസിഡന്‍റ്​

മഞ്ചേരി: സർക്കാറിന്‍റെ ബജറ്റ് വിഹിതത്തിൽ പുൽപറ്റ പഞ്ചായത്തിന് മുൻവർഷത്തെ അപേക്ഷിച്ച് മൂന്നിലൊന്ന്​ കുറവുള്ളതായി പ്രസിഡന്‍റ്​ പി.സി. അബ്ദുറഹ്മാൻ. പഞ്ചായത്തിന്‍റെ ദൈനംദിന പ്രവർത്തനങ്ങളെ പോലും ഇത്​ സാരമായി ബാധിക്കും. ജനറൽ പർപ്പസ് ഗ്രാന്‍റിൽ കഴിഞ്ഞ തവണ 2.28 കോടി അനുവദിച്ചപ്പോൾ ഇത്തവണ 71.22 ലക്ഷം രൂപ മാത്രമാണ് ലഭിച്ചത്​. ഉദ്യോഗസ്ഥരുടെ ശമ്പളം, ആനുകൂല്യം, ജനപ്രതിനിധികളുടെ ഓണറേറിയം എന്നിവ ഈ ഗ്രാൻറിൽ നിന്നാണ് അനുവദിക്കുന്നത്. ഇതിൽനിന്ന്​ വികസനപ്രവർത്തനങ്ങൾക്ക് മാറ്റിവെക്കാറില്ല. അംഗൻവാടി പോഷകാഹാരത്തിനു മാത്രം 85 ലക്ഷം രൂപ കണ്ടെത്തണം. സർക്കാറിന്‍റെ പുതിയ ജനകീയാസൂത്രണ പദ്ധതി നിർദേശപ്രകാരം അതിദരിദ്രരുടെ പട്ടികയിൽ ഉൾപ്പെട്ടവർക്ക്​ 30,000 രൂപ വീതം നീക്കിവെക്കണം. സർവേ പ്രകാരം 145 പേരാണ് പട്ടികയിലുള്ളത്. ഭിന്നശേഷിക്കാർ, കുട്ടികൾ, വയോജനങ്ങൾ എന്നിവർക്ക് പോലും നീക്കിവെക്കാൻ തുകയില്ലാത്ത സ്ഥിതിയാണ്. കോവിഡ് പ്രതിരോധനത്തിനായി തനത് ഫണ്ടിൽനിന്ന്​ ലക്ഷക്കണക്കിന് രൂപ ചെലവഴിക്കേണ്ടി വന്നു. ജനസംഖ്യാനുപാതികമായി പഞ്ചായത്തിന് ബജറ്റ് തുക അനുവദിച്ചില്ലെങ്കിൽ ദൈനംദിന പ്രവർത്തനങ്ങളെയും മറ്റ് വികസന പ്രവർത്തനങ്ങളെയും ബാധിക്കും. മുൻവർഷത്തെ തുകയെങ്കിലും അനുവദിക്കാൻ നടപടിയെടുക്കണമെന്നും പ്രസിഡന്‍റ്​ ആവശ്യപ്പെട്ടു.