പ്രതിപക്ഷശബ്​ദത്തെ ഗുണ്ടകളെ ഉപയോഗിച്ച്​ സി.പി.എം അടിച്ചമർത്തുന്നു​ -കേന്ദ്രമന്ത്രി വി. മുരളീധരൻ

പാലക്കാട്​: സംസ്ഥാനത്ത്​ പ്രതിപക്ഷശബ്ദത്തെ ഗുണ്ടകളെ ഉപയോഗിച്ച്​ അടിച്ചമർത്താനാണ്​ സി.പി.എം ശ്രമമെന്ന്​ കേന്ദ്രമന്ത്രി വി. മുരളീധരൻ. ഗുണ്ടാസംഘങ്ങളെ കയറൂരിവിട്ടിരിക്കുകയാണ്​. ബജറ്റിൽ ​ലോകസമാധാനത്തിനായി പണം നീക്കിവെച്ച ദിവസംതന്നെയാണ് തരൂരിൽ ഒരു യുവാവ്​ കൊല്ലപ്പെട്ടത്​. നാട്ടിൽ സമാധാനമുണ്ടാക്കിയിട്ട്​ പോരേ ലോകസമാധാനത്തിന്​ പണം നീക്കിവെക്കേണ്ടത്​? സി.പി.എം ജില്ല സെക്രട്ടറി പറയുന്നത്​ നടപ്പാക്കേണ്ട ഗതികേടിലാണ്​ പൊലീസെന്നും വി. മുരളീധരൻ മാധ്യമപ്രവർത്തകരോട്​ പറഞ്ഞു. ഉത്തർപ്രദേശ്​ കേരളത്തെ കണ്ട് പഠിക്കണമെന്ന അഭിപ്രായം വി.ഡി. സതീശനുണ്ടോ എന്ന് വ്യക്തമാക്കണം. രാജ്യം മോദിയുടെ വികസന രാഷ്ട്രീയത്തെ അംഗീകരിച്ചു. മോദി ഉയർത്തിക്കാട്ടിയ വികസനങ്ങൾ അംഗീകരിച്ച നാല്​ സംസ്ഥാനങ്ങളിലാണ് ബി.ജെ.പി മികച്ച വിജയം കൈവരിച്ചത്.​ കോൺഗ്രസിന്‍റെ പരീക്ഷണം തകർന്നു. കോൺഗ്രസ് എന്ന പാർട്ടിയോട് ജനങ്ങൾക്കുണ്ടായിരുന്ന വിശ്വാസം പൂർണമായും ഇല്ലാതായി. നെഹ്​റുകുടുംബത്തോടുള്ള വിയോജിപ്പ് ജനങ്ങൾ വീണ്ടും പ്രകടിപ്പിച്ചെന്നും മുരളീധരൻ പറഞ്ഞു.