ഹജ്ജ് പുറപ്പെടല്‍ കേന്ദ്രം കരിപ്പൂരില്‍ പുനരാരംഭിക്കണം; കരിപ്പൂരില്‍ ജനകീയ നില്‍പ്പ് സമരം നാളെ

ഹജ്ജ് പുറപ്പെടല്‍ കേന്ദ്രം: കരിപ്പൂരില്‍ നാളെ നിൽപു​സമരം കൊണ്ടോട്ടി: കരിപ്പൂരില്‍ ഹജ്ജ് പുറപ്പെടല്‍ കേന്ദ്രമൊരുക്കണമെന്നാവശ്യപ്പെട്ട് ഞായറാഴ്ച നില്‍പുസമരം സംഘടിപ്പിക്കും. കേരള ഹജ്ജ് വെൽഫെയര്‍ അസോസിയേഷനും ഹജ്ജ് വെല്‍ഫെയര്‍ ഫോറവും സംയുക്തമായാണ്​ പ്രക്ഷോഭം സംഘടിപ്പിക്കുന്നതെന്ന്​ ഭാരവാഹികള്‍ വാര്‍ത്തസമ്മേളനത്തില്‍ അറിയിച്ചു. വൈകീട്ട്​ നാലിന് എയര്‍പോര്‍ട്ട് ജങ്​ഷനില്‍നിന്ന് ജനകീയ നില്‍പുസമരം ആരംഭിക്കും. കഴിഞ്ഞദിവസം രൂപവത്​കരിച്ച കരിപ്പൂര്‍ എംബാർക്കേഷന്‍ ആക്ഷന്‍ ഫോറം കൂട്ടായ്മയുടെ ആഭിമുഖ്യത്തിലാണ് സമരം. അപേക്ഷകരില്‍ 80 ശതമാനത്തിലധികം പേര്‍ക്കും ഉപയോഗപ്രദമായ കരിപ്പൂര്‍ വിമാനത്താവളത്തെ അവഗണിച്ചു നെടുമ്പാ​ശ്ശേരിയെ പുറപ്പെടല്‍ കേന്ദ്രമാക്കിയത് അംഗീകരിക്കാനാകില്ലെന്ന്​ ഭാരവാഹികൾ അറിയിച്ചു. ഹജ്ജ് തീര്‍ഥാടകരില്‍ മുതിര്‍ന്നവരാണ് കൂടുതല്‍. ഇക്കാര്യത്തില്‍ മാനുഷിക പരിഗണന കേന്ദ്ര സര്‍ക്കാറിന്റെ ഭാഗത്തു നിന്നുണ്ടാകണമെന്ന് സമര സമിതി ഭാരവാഹികളായ പി. അബ്ദുറഹ്‌മാന്‍, ടി. അബ്ദുല്‍ അസീസ് ഹാജി, തറയിട്ടാല്‍ ഹസന്‍ സഖാഫി, ചുക്കാന്‍ ബിച്ചു എന്നിവര്‍ ആവശ്യപ്പെട്ടു.