മിഷൻ ഇന്ദ്രധനുസ്​​ നാലാം ഘട്ടം ഏഴ്​ മുതൽ

മലപ്പുറം: പ്രതിരോധ കുത്തിവെപ്പിലെ കുറവ്​ പരിഹരിക്കാനായി നടത്തുന്ന പ്രത്യേക ഇമ്യൂണൈസേഷൻ പരിപാടിയായ ഇന്‍റൻസിഫൈഡ്​ മിഷൻ ഇന്ദ്രധനുസ്​ നാലാംഘട്ടം ജില്ലയിൽ മാർച്ച്​ ഏഴിന്​ ആരംഭിക്കുമെന്ന്​ ആരോഗ്യവകുപ്പ്​ അധികൃതർ അറിയിച്ചു. കുത്തിവെപ്പിൽ പിന്നാക്കം നിൽക്കുന്ന ജില്ലകളിലാണ്​ പ്രത്യേക പരിപാടി നടക്കുന്നത്​. സംസ്ഥാനത്ത്​ തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂർ, പാലക്കാട്​, മലപ്പുറം, കോഴിക്കോട്​, കണ്ണൂർ ജില്ലകളിലാണ്​ നാലാംഘട്ടം നടപ്പാക്കുന്നതെന്ന്​ പദ്ധതിയുമായി ബന്ധപ്പെട്ട്​ മാധ്യമപ്രവർത്തകർക്ക്​ നടത്തിയ ശിൽപശാലയിൽ ജില്ല ആർ.സി.എച്ച്​ ഓഫിസർ ഡോ. എ. ഷിബുലാൽ വിശദീകരിച്ചു. മാർച്ച്​ ഏഴ്, ഏപ്രിൽ നാല്​, മേയ്​ നാല്​ എന്നീ ദിവസങ്ങൾ മുതൽ ഏഴ്​ പ്രവൃത്തി ദിനങ്ങളിലാണ്​ പരിപാടി നടക്കുന്നത്​. ജില്ലയിലെ ഓരോ ആരോഗ്യ കേന്ദ്രങ്ങളുടെയും പരിധിയിലുള്ള രണ്ട്​ വയസ്സിൽ താഴെയുള്ള പ്രതിരോധ കുത്തിവെപ്പ്​ ഇതുവരെ എടുക്കാത്തതും ഏതെങ്കിലും കുത്തിവെപ്പ്​ മാത്രം എടുത്തതുമായ കുട്ടികളുടെ പട്ടിക ഇതിനായി തയാറാക്കിയിട്ടുണ്ട്​. 546 കുത്തിവെപ്പ്​ കേന്ദ്രങ്ങളാണ്​ തയാറാക്കിയത്​. 354 ഗർഭിണികളെയും 10,496 കുട്ടികളെയുമാണ്​ മിഷൻ ഇന്ദ്രധനുസിന്‍റെ ഭാഗമായി ലക്ഷ്യമിടുന്നത്​. ശിൽപശാല ജില്ല മെഡിക്കൽ ഓഫിസർ ഡോ. ആർ. രേണുക ഉദ്​ഘാടനം ചെയ്തു. ഡെപ്യൂട്ടി മാസ്​ മീഡിയ ഓഫിസർ വി. ബിജുമോൻ നന്ദി പറഞ്ഞു.