ഞങ്ങൾക്ക് പഠിക്കാൻ സ്കൂൾ വേണം; യൂസുഫലിക്ക്​ കത്തെഴുതി വിദ്യാർഥികൾ

ഞങ്ങൾക്ക് പഠിക്കാൻ സ്കൂൾ വേണം; യൂസുഫലിക്ക്​ കത്തെഴുതി വിദ്യാർഥികൾ ചാവക്കാട്: പഠിക്കുന്ന സ്കൂളിന്‍റെ ദുരവസ്ഥ വിശദീകരിച്ച്​ ഇരട്ടപ്പുഴ ജി.എൽ.പി സ്കൂൾ വിദ്യാർഥികൾ ലുലു ഗ്രൂപ് ചെയർമാൻ എം.എ. യൂസുഫലിക്ക്​ കത്തയച്ചു. 97 വർഷം പിന്നിട്ട സ്കൂൾ കാലങ്ങളായി വാടക കെട്ടിടത്തിലാണ്​ പ്രവർത്തിക്കുന്നത്​. കെട്ടിടം എത്രയും പെട്ടെന്ന്​ ഒഴിഞ്ഞുകൊടുക്കണമെന്ന്​ സ്ഥലയുടമകൾ ആവശ്യപ്പെടുന്നു. അറ്റകുറ്റപ്പണി നടത്താത്ത കാരണം സ്കൂൾ നിലം പൊത്താവുന്ന സ്ഥിതിയിലാണ്​. ശോച്യാവസ്ഥയിലുള്ള സ്കൂളിന് അധികൃതർ ഫിറ്റ്നസ് സർട്ടിഫിക്കറ്റ് നൽകിയിട്ടുമില്ല. ഇരട്ടപ്പുഴ ഉദയ വായനശാലയുടെ പരിമിതമായ സൗകര്യത്തിലാണ്​ ക്ലാസ് മുറികൾ ഇപ്പോൾ പ്രവർത്തിക്കുന്നത്. ഈ സാഹചര്യത്തിലാണ് സ്കൂളിന്റെ അവസ്ഥ വിവരിച്ച് വിദ്യാർഥികൾ കൂട്ടത്തോടെ യൂസുഫലിക്ക് എഴുത്തയച്ചത്. തെരഞ്ഞെടുത്ത നൂറ്​ വിദ്യാർഥികളാണ് കത്തയച്ചത്. അദ്ദേഹത്തിൽനിന്ന് നല്ല പ്രതികരണമുണ്ടാകുമെന്ന വിശ്വാസത്തിലാണ് വിദ്യാർഥികളും രക്ഷിതാക്കളും അധ്യാപകരും വായനശാല പ്രവർത്തകരും. പ്രസിഡന്റ് നളിനാക്ഷൻ ഇരട്ടപ്പുഴ, ഹെഡ്മിസ്ട്രസ് ശ്രീധര ടീച്ചർ, വലീദ് തെരുവത്ത്, പ്രകാശൻ, സുബൈർ ചക്കര, സിദ്ധാർഥൻ എന്നിവർ നേതൃത്വം നൽകി. ഫോട്ടോ: TCC CKD Letters to Yusafali പഠിക്കാൻ സ്കൂൾ വേണമെന്നാവശ്യപ്പെട്ട് ഇരട്ടപ്പുഴ ജി.എൽ.പി സ്കൂൾ വിദ്യാർഥികൾ ലുലു ഗ്രൂപ് ചെയർമാൻ യൂസഫലിക്ക് കത്തയക്കുന്നു