ആശുപത്രിയിലെ കൈയേറ്റം: ഡോക്ടർമാർ ഇന്ന്​ പണിമുടക്കും

പെരിന്തൽമണ്ണ: ഇ.എം.എസ് ആശുപത്രിയിൽ ഡോക്ടർമാരെയും മറ്റു ജീവനക്കാരെയും കൈയേറ്റം ചെയ്യുകയും ആശുപത്രിക്ക് കേടുപാട്​ വരുത്തുകയും ചെയ്തതിൽ പ്രതിഷേധിച്ച് ഐ.എം.എ പെരിന്തൽമണ്ണ ബ്രാഞ്ചിലെ ഡോക്ടർമാർ തിങ്കളാഴ്ച പണിമുടക്കും. എമർജൻസി സർവിസ് ഒഴികെ എല്ലാ ഒ.പികളും സ്തംഭിക്കും. വെള്ളിയാഴ്ച രാവിലെയാണ് വാഹനാപകടത്തിൽ പരിക്കേറ്റ രോഗി ഐ.സി.യുവിൽ രക്തസമ്മർദം കുറഞ്ഞ്​ മരിച്ചത്. രണ്ട് ദിവസം കഴിഞ്ഞിട്ടും അക്രമികളെ അറസ്റ്റ് ചെയ്യാത്തതിൽ പ്രതിഷേധിച്ചാണ് ഡോക്ടർമാരുടെ ഒ.പി ബഹിഷ്കരണം. തുടർന്നും പൊലീസ്​ നിഷ്​ക്രിയമായാൽ ജില്ലതലത്തിൽ ചൊവ്വാഴ്ച മുതൽ സമരത്തിനിറങ്ങുമെന്ന്​ പ്രസിഡന്റ്‌ ഡോ. മുഹമ്മദ്‌ അബ്ദുൽ നാസറും സെക്രട്ടറി ഡോ. കെ.ബി. ജലീലും മുന്നറിയിപ്പ്​ നൽകി.