ദേശീയപാതയില്‍ സിനിമയെ വെല്ലുന്ന നാടകീയ രംഗങ്ങള്‍; ക്ലൈമാക്‌സ് മണ്ണുത്തി സ്റ്റേഷനില്‍

മണ്ണുത്തി: ദേശീയപാതയിലെ തോട്ടപ്പടി മേല്‍പാലത്തില്‍ സിനിമ ചിത്രീകരണംപോലെ സാഹസികത നിറഞ്ഞ രംഗങ്ങള്‍ കണ്ട് നാട്ടുകാര്‍ ഞെട്ടി. കാറിന്​ കുറുകെ മറ്റൊരു കാറിട്ട്​ യുവതിയെ ബലമായി കാറിൽ കയറ്റിക്കൊണ്ടുപോകാൻ ശ്രമിക്കുന്ന കാഴ്ചയായിരുന്നു അത്​. രംഗം കൂടുതല്‍ വഷളാവാന്‍ തുടങ്ങിയതോടെ നാട്ടുകാര്‍ കുറുകെയിട്ട വണ്ടി തടഞ്ഞ്​ എല്ലാവരെയും മണ്ണുത്തി പൊലീസിന് കൈമാറി. ബുധനാഴ്ച വൈകീട്ട്​ മൂന്നോടെ പാലക്കാട് ഭാഗത്തുനിന്ന്​ വരുകയായിരുന്ന കാറിനെയാണ്​ മറ്റൊരു കാര്‍ തടഞ്ഞുനിർത്തിയത്​. കാറില്‍നിന്ന്​ രണ്ടുപേര്‍ ഇറങ്ങി തടഞ്ഞുനിർത്തിയ കാറിന്റെ വാതിൽ വലിച്ചു തുറന്ന് യുവതിയെ ബലം പ്രയോഗിച്ച് ഇറക്കി ഇവരുടെ കാറില്‍ കയറ്റി. ഇതോടെ യുവതിയുടെ പിതാവ്​ കാറിന്റെ ബോണറ്റില്‍ കയറി ഇരുന്നു. കാര്‍ മുന്നോട്ട് എടുക്കുമെന്ന അവസ്ഥയില്‍ കാറിന്റെ വൈപ്പറില്‍ പിടിച്ച് താഴെ വീഴാതിരിക്കാന്‍ ശ്രമിച്ചു. ഇത്രയുമായപ്പോള്‍ നാട്ടുകാര്‍ ഓടിയെത്തി എല്ലാവരെയും തടഞ്ഞുനിർത്തി കാര്യങ്ങള്‍ തിരക്കി. ശേഷം പൊലീസിനെ അറിയിച്ചു. മണ്ണുത്തി സ്റ്റേഷനില്‍ എത്തിച്ച്​ എല്ലാവരുടെയും മൊഴി എടുത്തു​. പെൺകുട്ടിയെ തട്ടിക്കൊണ്ടുപോകാൻ ശ്രമിച്ചെന്ന പിതാവിന്‍റെ പരാതിയിൽ മണ്ണൂത്തി പൊലീസ്​ കേസെടുത്തു. വിശദാംശം അന്വേഷിച്ച്​ വരികയാണെന്ന്​ പൊലീസ്​ അറിയിച്ചു. ഇതിനകം സ്റ്റേഷനില്‍ എത്തിയവരും സംഭവം അറിഞ്ഞ് എത്തിയ ബന്ധുക്കളും ചേര്‍ന്ന് വലിയ ഒരു ജനക്കൂട്ടംതന്നെ സ്റ്റേഷന്​ മുന്നില്‍ ഉണ്ടായി.