നാടുകാണി ചുരം പാത തുറക്കാൻ അനുമതിയായി

ആറ് മാസത്തോളമായി ചുരം വഴി യാത്രാനുമതി ഉണ്ടായിരുന്നില്ല നിലമ്പൂർ: കോവിഡ് വ‍്യാപനത്തെ തുടർന്ന് യാത്രാനിരോധനം ഏർപ്പെടുത്തിയ നാടുകാണി ചുരം പാത തുറക്കാൻ അനുമതി. ശനിയാഴ്ച രാത്രിയോടെയാണ് ജില്ല ഭരണകൂടം ഇതു സംബന്ധിച്ച്​ ഉത്തരവ് ഇറക്കിയത്. സർക്കാറി‍ൻെറ ജാഗ്രത പോർട്ടലിൽ രജിസ്​റ്റർ ചെയ്തവർക്കാണ് യാത്രാനുമതി. ഞായറാഴ്ച മുതൽ യാത്രകൾ അനുവദിക്കും. നിലമ്പൂർ തഹസിൽദാർ സുഭാഷ് ചന്ദ്രബോസി‍ൻെറ നേതൃത്വത്തിലുള്ള സംഘം ഞായറാഴ്ച രാവിലെ ചുരം സന്ദർശിക്കും. വഴിക്കടവിൽ പ്രത്യേക നിരീക്ഷണ സംവിധാനം ഒരുക്കും. വിൽപനനികുതി ചെക്ക്പോസ്​റ്റ്​ പ്രവർത്തിച്ചിരുന്ന ആനമറിയിലാണ് 24 മണിക്കൂറും പ്രവർത്തിക്കുന്ന കമ്പ്യൂട്ടർ സംവിധാനത്തോടെയുള്ള പ്രത്യേക കൗണ്ടർ പ്രവർത്തിക്കുക. കേരള-തമിഴ്നാട് അതിർത്തി പങ്കിടുന്ന പ്രദേശമാണിത്. രണ്ട് സംസ്ഥാനവുമായി കൂടിയാലോചിച്ച് പ്രവർത്തിക്കുന്ന ഏകീകരിച്ച സംവിധാനമാണ് പ്രത്യേക കൗണ്ടറിൽ നടപ്പാക്കുക. ജാഗ്രത പോർട്ടലിൽ രജിസ്​റ്റർ ചെയ്യാത്ത യാത്രക്കാർക്ക് രജിസ്​റ്റർ ചെയ്യാനുള്ള സൗകര‍്യവും കൗണ്ടറിൽ ഒരുക്കും. അതിർത്തി കടന്ന് വരുന്നവരുടെ വിവരങ്ങൾ കൗണ്ടറിൽ രേഖപ്പെടുത്തും. കോവിഡ് വ‍്യാപനഭീതി മൂലം മാർച്ചിലാണ് ചുരം വഴിയുള്ള യാത്രാവാഹനങ്ങൾക്ക് സർക്കാർ നിരോധനം ഏർപ്പെടുത്തിയത്. ചരക്ക് വാഹനങ്ങൾക്ക് മാത്രമാണ് ചുരം വഴി യാത്രാനുമതി ഉണ്ടായിരുന്നുള്ളൂ.