തെരഞ്ഞെടുപ്പ്​ വാഗ്​ദാനങ്ങൾക്ക്​ പുല്ലുവില; പ്രതിഷേധം ശക്തമാക്കാനൊരുങ്ങി ഉദ്യോഗാർഥികൾ

മലപ്പുറം: 'അപ്രഖ്യാപിത നിയമന നിരോധനം പിൻവലിക്കും, തസ്​തികകൾ വെട്ടിക്കുറക്കുന്ന രീതി അവസാനിപ്പിക്കും, അഡ്വൈസ്​ മെമ്മോ ലഭിച്ച്​ 90 ദിവസത്തിനകം നിയമന ഉത്തരവ്​ ലഭിക്കുമെന്ന്​ ഉറപ്പുവരുത്തും, ഒാരോ വകുപ്പുകളിലുമുണ്ടാകുന്ന ഒ​ഴിവുകൾ 10 ദിവസത്തിനകം റിപ്പോർട്ട്​ ചെയ്യും'... 2016ൽ എൽ.ഡി.എഫ്​ തെരഞ്ഞെടുപ്പ് പ്രകടനപത്രികയിലെ പ്രധാന വാഗ്​ദാനങ്ങളാണിവ. ഇൗ വാഗ്​ദാനങ്ങളൊന്നും പാലിക്കാതെ കരാർ നിയമനവും ആശ്രിതനിയമനവും നടത്തി റാങ്ക്​ പട്ടികകൾ റദ്ദാക്കുന്ന പി.എസ്​.സി നടപടിക്കെതിരെ ഉദ്യോഗാർഥികളുടെ അമർഷം ശക്തമാകുകയാണ്​. പി.എസ്​.സി റാങ്ക്​ പട്ടികയിൽ ഉൾപ്പെട്ടിട്ടും ​നിയമനം ലഭിക്കാത്തതിൽ മനംനൊന്ത്​ ആത്​മഹത്യ ചെയ്​ത തിരുവനന്തപുരം തട്ടിട്ടമ്പലം സ്വദേശി അനു പി.എസ്​.സിയുടെ പിടിപ്പുകേടി​ൻെറ ഇരയാണെന്ന്​ ഉദ്യോഗാർഥികൾ ആരോപിക്കുന്നു​. റാങ്ക്​ പട്ടികയിൽനിന്ന്​ നിരവധി പേർക്ക്​ നിയമനങ്ങൾ ലഭിക്കുന്ന പരീക്ഷകളാണ്​ എൽ.ഡി ക്ലർക്ക്​, എൽ.ജി.എസ്​, സി.പി.ഒ, ഫോറസ്​റ്റ്​ ഡിപ്പോ വാച്ചർ, മാവേലി സ്​റ്റോറുകളിലെ എ.എസ്​.എം, നഴ്​സ്​ തുടങ്ങിയവ. റാങ്ക്​ പട്ടിക അവസാനിക്കാൻ മാസങ്ങൾ ശേഷിച്ചിട്ടും കുറച്ചുപേരെയാണ്​ നിയമിച്ചിട്ടുള്ളത്​. 2018ൽ കഴിഞ്ഞ എൽ.ജി​.എസ് റാങ്ക്​ പട്ടികയിൽ 46,000ത്തോളം ഉദ്യോഗാർഥികളാണ്​ ഇടംപിടിച്ചത്​. എട്ട്​ ശതമാനം നിയമനം പോലും നടന്നിട്ടില്ല. 2021 ജൂണിൽ ഈ പട്ടികയ​ുടെ കാലാവധി അവസാനിക്കും. 2017ലെ എൽ.ഡി ക്ലർക്ക് പട്ടികയിൽ 15,000ഓളം പേരാണ്​ ഇടം നേടിയത്​. കുറച്ചുപേരെ മാത്രമാണ്​ ഇൗ പട്ടികയിൽനിന്ന്​ നിയമിച്ചത്​. 2021 മാർച്ചോടെ ഈ പട്ടിക റദ്ദാകും. ആറുമാസത്തിൽ കൂടുതൽ കരാർ നിയമനമുണ്ടായാൽ അതത്​ വകുപ്പുകൾ പി.എസ്​.സിക്ക്​ റിപ്പോർട്ട്​ നൽകണമെന്നാണ്​ ചട്ടം. മിക്ക വകുപ്പുകളിലും കരാർ നിയമനവും ആശ്രിതനിയമനവും തുടരുകയാണ്​. സംസ്ഥാനത്തെ വിവിധ സർവകലാശാലകളിൽ യൂനിവേഴ്​സിറ്റി​ എൽ.ജി.എസ്​ തസ്​തിക പി.എസ്​.സിക്ക്​ വിടുമെന്ന്​ ​യു.ഡി.എഫ്​ ഭരണകാലത്ത്​ പ്രതിപക്ഷം അറിയിച്ചിരുന്നു. എൽ.ഡി.എഫിന്​ ഭരണം ലഭിച്ചെങ്കിലും ഇതിൽ തുടർനടപടിയുണ്ടായില്ല. കൂടാതെ ഈ തസ്​തികകളിൽ കരാർ നിയമനങ്ങളാണ് ​നടത്തിയിട്ടുള്ളത്​​. മാവേലി സ്​റ്റോറിലെ എ.എസ്​.എം റാങ്ക്​ ലിസ്​റ്റ്​ നിലവിലുണ്ടായിട്ടും ആറായിരത്തോളം പേരെ താൽ​ക്കാലികമായി നിയമിച്ചിട്ടുണ്ട്​. ആറായിരത്തോളം സ്​റ്റാഫ്​ നഴ്​സുമാരുടെ റാങ്ക്​ പട്ടിക നിലവിലുണ്ടായിട്ടും മൂവായിരത്തോളം ​പേരെയാണ്​ താൽക്കാലികമായി നിയമിച്ചത്​. വനം വക​ുപ്പിൽ നൈറ്റ്​ വാച്ച്​മാൻ തസ്​തിക നിലവിലുണ്ട്​. പ്രാദേശികമായി ആളുകളെ നിയമിക്കാൻ സ്വകാര്യ ഏജൻസികളെയാണ്​ നിയമിച്ചിട്ടുള്ളത്​. കെ.എസ്​.ഇ.ബിയിൽ ലാസ്​റ്റ്​ ഗ്രേഡ്​ നികത്താൻ കുടുംബശ്രീയിൽനിന്ന്​ നിയമിക്കുന്നതും ഉ​േദ്യാഗാർഥികളിൽ ആശങ്കയുണ്ടാക്കുന്നു. സംസ്ഥാനത്ത്​ 514 തസ്​തികകളുണ്ടെങ്കിലും 472 പേരെ കരാർ പ്രകാരമാണ്​ നിയമിച്ചത്​. പി.എസ്​.സി വഴി നിയമനം നടത്തിയത്​ മൂന്നുപേരെയാണ്​. കുടുംബശ്രീയിൽനിന്ന്​ നിയമനം നടത്തുന്നതിൽ ഭൂരിഭാഗം പേരും ഇടതുപാർട്ടി അംഗങ്ങളാണെന്നും ഉദ്യോഗാർഥികൾ ആരോപിക്കുന്നു. എൽ.ഡി.വി ​േഗ്രഡ്​ II ഡ്രൈവർ തസ്​തികയുടെ 251 പേരുടെ റാങ്ക്​ പട്ടിക നിലവിലുണ്ട്​. എന്നാൽ, 147 താൽക്കാലിക നിയമനങ്ങളാണ്​ ഇതുവരെ നടത്തിയത്​. പൊലീസ്​, എക്​സൈസ്​ ഒഴികെ ജി.എസ്​.ടി, മോ​ട്ടോർ വാഹന വകുപ്പ്​, റവന്യൂ വകുപ്പുകളിലെ ഡ്രൈവർമാരുടെ നിയമനത്തിനുള്ള പട്ടികയാണിത്​. 2021 ഫെബ്രുവരിയിൽ ഈ പട്ടിക റദ്ദാകുമെന്ന്​ ഉദ്യോഗാർഥികൾ പറയുന്നു. -കെ.എം.എം അസ്​ലം