ടി.വി വിതരണം

വളാഞ്ചേരി: ജനമൈത്രി പൊലീസ് നേതൃത്വത്തിൽ സ്​റ്റേഷൻ പരിധിയിലെ സാമ്പത്തികമായി പിന്നാക്കം നിൽക്കുന്നതും ഓൺലൈൻ പഠനത്തിന് സൗകര്യമില്ലാത്തതുമായ വിദ്യാർഥികൾക്ക് ടി.വികൾ വിതരണം ചെയ്തു. വളാഞ്ചേരി നഗരസഭയിൽപെട്ട പടിഞ്ഞാക്കരയിലുള്ള മൂന്ന് കുട്ടികൾ അടങ്ങിയ കുടുംബത്തിനും എടയൂർ ഗ്രാമപഞ്ചായത്തിലെ പീടികപടിയിലെ കുടുംബത്തിനുമാണ് ടി.വി സൗജന്യമായി നൽകിയത്. ശമ്പളത്തിൽനിന്ന്​ ഒരു വിഹിതം മാറ്റിവെച്ചാണ് ടി.വിക്കുള്ള തുക പൊലീസുകാർ സ്വരൂപിച്ചത്. വളാഞ്ചേരി പൊലീസ് സ്​റ്റേഷൻ എസ്.എച്ച്.ഒ എം.കെ. ഷാജി ടി.വികൾ വിതരണം ചെയ്തു. എടയൂർ ഗ്രാമപഞ്ചായത്ത് പ്രസിഡൻറ്​ കെ.കെ. രാജീവ് മാസ്​റ്റർ, കരിപ്പോൾ ഗവ. ഹൈസ്കൂൾ അധ്യാപിക രാധാമണി ഐങ്കലത്ത്, എസ്.ഐമാരായ മുരളീകൃഷ്ണൻ, സിദ്ദീഖ്, സീനിയർ സിവിൽ പൊലീസ് ഓഫിസർമാരായ രമേശൻ, എം.വി. മോഹനൻ, കൃഷ്ണ പ്രസാദ്, സ്പെഷൽ ബ്രാഞ്ച് ഓഫിസർ നസീർ തിരൂർക്കാട് എന്നിവർ ചടങ്ങിൽ പങ്കെടുത്തു.