ഡെങ്കി: പ്രതിരോധ നടപടികള്‍ ഊര്‍ജിതമാക്കി

കണ്ണൂർ: തലശ്ശേരി അഗ്‌നിരക്ഷാസേന യൂനിറ്റിലെ ജീവനക്കാര്‍ക്കിടയില്‍ ഡെങ്കി റിപ്പോര്‍ട്ട് ചെയ്ത സാഹചര്യത്തില്‍ പ്രതിരോധ നടപടികള്‍ ഊര്‍ജിതപ്പെടുത്തി ആരോഗ്യ വകുപ്പ്. ജില്ല വെക്ടര്‍ കണ്‍ട്രോള്‍ യൂനിറ്റ്, തലശ്ശേരി ജനറല്‍ ആശുപത്രി എന്നിവിടങ്ങളിലെ ജീവനക്കാരുടെ നേതൃത്വത്തില്‍ ഊർജിത ഉറവിട നശീകരണ പ്രവര്‍ത്തനങ്ങള്‍, തെര്‍മല്‍ ഫോഗിങ്​ എന്നിവ നടത്തി. ജീവനക്കാര്‍ക്ക് ആവശ്യമായ വ്യക്തിഗത സുരക്ഷാസാമഗ്രികള്‍, കൊതുകുവല എന്നിവയും വിതരണം ചെയ്തു. ജില്ല സർവെയ്​ലന്‍സ് ഓഫിസര്‍ ഡോ. കെ. മായ, ജില്ല മലേറിയ ഓഫിസര്‍ വി. സുരേശന്‍ എന്നിവരുടെ നേതൃത്വത്തില്‍ സ്ഥലം സന്ദര്‍ശിക്കുകയും ആവശ്യമായ നിര്‍ദേശങ്ങള്‍ നല്‍കുകയും ചെയ്തു. സമീപത്തുള്ള സബ്കലക്ടര്‍ ഓഫിസ്, നിർമിതി കേന്ദ്ര തുടങ്ങിയ സ്ഥാപനങ്ങള്‍ സന്ദര്‍ശിച്ച് ജീവനക്കാര്‍ക്ക് മാര്‍ഗനിര്‍ദേശങ്ങള്‍ നല്‍കി.