വന്യജീവി പ്രതിരോധത്തിന്​ ജൈവവേലി പദ്ധതി

കൊട്ടിയൂർ: വന്യജീവി പ്രതിരോധത്തിനായുള്ള പാൽമിറ ജൈവവേലി പദ്ധതി ഉദ്ഘാടനം ചെയ്തു. സംസ്ഥാനത്ത്​ ആദ്യമായാണ് ഇത്തരത്തിലുള്ള പദ്ധതി. കൊട്ടിയൂർ കണ്ടപ്പുനത്ത് നടന്ന പരിപാടിയിൽ വിഡിയോ സന്ദേശത്തിലൂടെ വനംമന്ത്രി കെ.രാജുവാണ് പദ്ധതി ഉദ്ഘാടനം ചെയ്തത്. അഡ്വ.സണ്ണി ജോസഫ് എം.എൽ.എ അധ്യക്ഷത വഹിച്ചു. ആറളം വൈൽഡ് ലൈഫ് ഡിവിഷ​ൻെറ നേതൃത്വത്തിൽ കൊട്ടിയൂർ പന്നിയാംമലയിലാണ് പാൽമിറ പനകൾ നട്ട് ജൈവവേലി തീർക്കുക. പാലക്കാട് വൈൽഡ് ലൈഫ് ചീഫ് ഫോറസ്​റ്റ്​ കൺസർവേറ്റർ കെ. വിജയാനന്ദൻ, ആറളം വൈൽഡ് ലൈഫ് വാർഡൻ എ.ഷജ്ന, കൊട്ടിയൂർ ഗ്രാമപഞ്ചായത്ത് പ്രസിഡൻറ്​ ഇന്ദിര ശ്രീധരൻ, വൈസ് പ്രസിഡൻറ്​ റോയി നമ്പുടാകം, ബ്ലോക്ക് പഞ്ചായത്ത് വൈസ് പ്രസിഡൻറ്​ വി. ഷാജി, വികസന സ്​ഥിരം സമിതി അധ്യക്ഷ ഉഷ അശോക് കുമാർ, ബ്ലോക്ക് പഞ്ചായത്തംഗം മാത്യു പറമ്പൻ തുടങ്ങിയവർ സംസാരിച്ചു.