താലൂക്ക്​ ഓഫിസ് വളപ്പിലെ വാഹന പാർക്കിങ്​ ദുരിതമാകുന്നു

തളിപ്പറമ്പ്: താലൂക്ക് ഓഫിസ് വളപ്പിൽ സ്വകാര്യ വാഹനങ്ങൾ നിർത്തിയിടുന്നത് പതിവായി. ജനങ്ങൾക്ക് ഓഫിസിനകത്തേക്ക് പ്രവേശിക്കാൻ പോലും കഴിയാത്ത സ്​ഥിതിയാണ്​. വിഷയത്തിൽ നടപടി സ്വീകരിക്കണമെന്ന ആവശ്യമുയരുകയാണ്. ആർ.ഡി.ഒ ഓഫിസ്, താലൂക്ക്​ ഓഫിസ്, ജില്ല വിദ്യാഭ്യാസ ഓഫിസ്, സബ് ട്രഷറി തുടങ്ങി 20ഓളം സർക്കാർ ഓഫിസുകളാണ് തളിപ്പറമ്പ് താലൂക്ക്​ ഓഫിസ് കോമ്പൗണ്ടിൽ പ്രവർത്തിക്കുന്നത്. പുലർച്ച പ്രധാന കവാടം തുറക്കുന്നതുമുതൽ സ്വകാര്യ വാഹനങ്ങൾ നിർത്തിയിടുന്ന സ്​ഥിതിയാണ് ഇവിടെ. രാവിലെ പാർക്ക് ചെയ്യുന്ന പല കാറുകളും വൈകീട്ട് ആറുമണി കഴിഞ്ഞാണ് തിരികെയെടുക്കുന്നത്. മറ്റിടങ്ങളിലേക്ക്​ ബസിൽ പോകുന്നവരാണ് ഇവിടെ കാർ നിർത്തിയിടുന്നത്. ഇതുകാരണം ഓഫിസ് ആവശ്യത്തിന് വാഹനങ്ങളുമായി വരുന്ന പൊതുജനങ്ങൾ പാർക്കിങ്ങിന്​ അലയേണ്ട ഗതികേടാണ്​. പലപ്പോഴും ആളുകൾക്ക് നടന്നുപോകാൻ പോലും കഴിയാത്ത വിധമാണ് വാഹനങ്ങൾ പാർക്ക് ചെയ്യുന്നത്. നേരത്തെ നിയന്ത്രണമുണ്ടായിരുന്നെങ്കിലും ഇപ്പോൾ ഒരു നിയന്ത്രണവുമില്ലാതെയാണ് പാർക്കിങ്​​.