പൊലീസ്​ സംഘ്​പരിവാറിന്​ കൂട്ടുനിൽക്കുന്നു -സി.പി.എം

പരപ്പനങ്ങാടി: എൽ.ഡി.എഫ് സർക്കാറിന്‍റെ പൊലീസ് നയത്തിനെതിരെ സംഘ്​പരിവാറിന് കൂട്ടുനിൽക്കുന്ന പരപ്പനങ്ങാടി പൊലീസ് ഉദ്യോഗസ്ഥർക്കെതിരെ നടപടിയെടുക്കണമെന്ന് സി.പി.എം ലോക്കൽ കമ്മിറ്റി ആവശ്യപ്പെട്ടു. കഴിഞ്ഞദിവസം ചിത്രകാരനും റിട്ട. അധ്യാപകനുമായ അത്തോളി നാരായണൻ മാസ്റ്റർ പുരാണകഥയെ ആസ്പദമാക്കിയുള്ള പെയിന്‍റിങ്​ ഫേസ്ബുക്കിൽ പോസ്റ്റ് ചെയ്തിരുന്നു. വർഷങ്ങൾക്കുമുമ്പ് പ്രചാരത്തിലുള്ള ഇന്ത്യൻ രാസലീല ശൃംഖല പെയിന്‍റിങ്ങിനെതിരെ ഇതുവരെ ഒരു പരാതിയും വന്നിരുന്നില്ല. എന്നാൽ, ആ പെയിന്‍റിങ്​ ശ്രീകൃഷ്ണ ജയന്തിയുമായി ബന്ധപ്പെട്ട് ഫേസ്ബുക്കിൽ പോസ്റ്റ് ചെയ്തപ്പോൾ ഹിന്ദുമതത്തെ അവഹേളിക്കലാണെന്ന് ചിത്രീകരിച്ച് ഒരുസംഘം വർഗീയവാദികൾ നാരായണൻ മാസ്റ്റർക്കെതിരെ പൊലീസിൽ പരാതി നൽകുകയായിരുന്നു. പരാതിയിൽ നടപടി സ്വീകരിച്ച്​ നാരായണൻ മാസ്റ്ററുടെ വീട്ടിലേക്ക് മാർച്ച് നടത്താൻ സൗകര്യമൊരുക്കി കൊടുത്ത പൊലീസ് നടപടി അപലപനീയവും പ്രതിഷേധാർഹവുമാണെന്ന് സി.പി.എം ലോക്കൽ കമ്മിറ്റി സെക്രട്ടറി അറിയിച്ചു.