മധു വധക്കേസ്​: പ്രതിഭാഗം അഭിഭാഷകനെതിരെ വിധിയിൽ പരാമർശം

മണ്ണാർക്കാട്: നിഷ്പക്ഷമായും ഭയരഹിതമായും ജോലി നിർവഹിക്കാൻ ന്യായാധിപന്മാർക്ക് കഴിയുമെന്നാണ് വിശ്വസിക്കുന്നതെന്ന് മധു വധക്കേസിൽ ജില്ല സ്പെഷൽ കോടതി ജഡ്ജി കെ.എം. രതീഷ് കുമാർ. കേസിലെ 12 പ്രതികളുടെ ജാമ്യം റദ്ദാക്കിയുള്ള വിധിയിലാണ് ജഡ്ജി ഇക്കാര്യം പറഞ്ഞത്. ഹൈകോടതി അനുവദിച്ച ജാമ്യം റദ്ദാക്കാൻ കീഴ്​കോടതിക്ക് അധികാരമില്ലെന്നും അങ്ങനെ ചെയ്താൽ ഹൈകോടതിയുടെ ചാർജ് മെമ്മോ ഉൾപ്പെടെ നടപടികൾ നേരിടേണ്ടിവരുമെന്നും ഇത് ജഡ്ജിയുടെ ഫോട്ടോ ഉൾപ്പെടെ ദിന​പത്രങ്ങളിൽ മോശം വാർത്ത വരാൻ ഇടയാക്കുമെന്നും പ്രതിഭാഗം അഭിഭാഷകരിലൊരാൾ മുന്നറിയിപ്പ് നൽകിയതായി ജഡ്ജി​ വിധിയിൽ പറയുന്നു. ശരിയായ തെളിവുകളുടെ അടിസ്ഥാനത്തിൽ കീഴ്​കോടതിയിലെ ന്യായാധിപന്മാർ എടുക്കുന്ന തീരുമാനത്തിന്റെ പേരിൽ ഹൈകോടതി ഇത്തരം നടപടികൾ സ്വീകരിക്കുമെന്ന് കരുതുന്നില്ലെന്നും ജഡ്ജി വിധിയിൽ തുടർന്നു. പ്രതിഭാഗം അഭിഭാഷകരുടെ ആശങ്കകളിൽനിന്നുണ്ടാകുന്ന ഇത്തരം പരാമർശങ്ങൾ കൂടുതൽ ചർച്ച ചെയ്യേണ്ടതില്ലെന്നും ജഡ്ജി പറഞ്ഞു. കേസിലെ മൂന്ന്​, ആറ്​, എട്ട്​, പത്ത്​, 12, 16 പ്രതികളുടെ അഭിഭാഷകനെതിരെയാണ് പരാമർശം.