കശ്മീർ പരാമർശം: പുതിയ വിവാദത്തിൽപ്പെട്ട്​ കെ.ടി. ജലീൽ

മലപ്പുറം: ഫേസ്​ബുക്ക്​​ പോസ്റ്റിൽ പാക്​ അധീന കശ്മീരിനെ 'ആസാദ്​ കശ്മീർ' എന്നു വിശേഷിപ്പിച്ച മുൻ മന്ത്രി കെ.ടി. ജലീൽ എം.എൽ.എ പുതിയ വിവാദത്തിൽ. തന്‍റെ കശ്മീർ യാത്രാനുഭവം വിവരിച്ചുള്ള സുദീർഘമായ ഫേസ്​ബുക്ക്​ പോസ്റ്റിലാണ്​ കശ്​മീരിന്‍റെ ചരിത്രം പറയുന്നിടത്ത്​ ''പാകിസ്താനോട്​ ചേർക്കപ്പെട്ട കശ്മീരിന്‍റെ ഭാഗം 'ആസാദ്​ കശ്മീർ' എന്നറിയപ്പെട്ടു'' എന്ന്​ വിശേഷിപ്പിച്ചത്​. പാകിസ്താൻ നിയന്ത്രണത്തിലുള്ള കശ്മീരിനെ 'പാക്​ അധീന കശ്മീർ' എന്നാണ് ഔദ്യോഗികമായി വിശേഷിപ്പിക്കാറ്​. പോസ്റ്റിൽ മറ്റൊരിടത്ത് ''ജമ്മുവും കശ്മീർ താഴ്വരയും ലഡാക്കുമടങ്ങിയ ഭാഗങ്ങളാണ്​ ഇന്ത്യൻ അധീന ജമ്മു കശ്മീർ'' എന്നും പറയുന്നുണ്ട്​. ഫേസ്​ബുക്ക്​ പോസ്റ്റിനെതിരെ വിമർശനവുമായി ​ബി.ജെ.പി അടക്കമുള്ളവർ രംഗത്തെത്തി. പഴയ സിമി നേതാവായ കെ.ടി. ജലീൽനിന്ന്​ ഇന്ത്യ വിരുദ്ധതയല്ലാതെ മറ്റൊന്നും പ്രതീക്ഷിക്കേണ്ടതില്ലെന്ന്​ ബി.ജെ.പി സംസ്ഥാന പ്രസിഡന്‍റ്​ കെ. സുരേന്ദ്രൻ ആരോപിച്ചു. പാക്​ അധീന കശ്മീരിനെ ആസാദ്​ കശ്മീരായി ദേശസ്നേഹികൾക്ക്​ കാണാനാവില്ലെന്നതടക്കമുള്ള വിമർശനങ്ങൾ ജലീലിന്‍റെ ഫേസ്​ബുക്ക്​​ പോസ്​റ്റിന്​ താഴെ നിറഞ്ഞിട്ടുണ്ട്​. ആസാദ്​ കശ്മീരെന്നും ഇന്ത്യൻ അധീന കശ്മീരെന്നും പറഞ്ഞ്​ മറ്റൊരു രാജ്യമാക്കി കാണിക്കാനുള്ള പഴയ സിമിക്കാരന്‍റെ ശ്രമമെന്ന ആരോപണം സംഘ്​പരിവാർ അനുകൂലികളും ഉന്നയിച്ചിട്ടുണ്ട്​.