പിതാവ്​ വിദേശത്തേക്ക്​ കൊണ്ടുപോയ കുട്ടികളെ തിരിച്ചെത്തിക്കണമെന്ന്​ കുടുംബകോടതി

മലപ്പുറം: വിദേശത്തേക്ക്​ കൊണ്ടുപോയ കുട്ടികളെ തിരിച്ചെത്തിക്കാൻ പിതാവിനോട്​ കുടുംബകോടതി ഉത്തരവിട്ടു​. കൊണ്ടോട്ടി സ്വദേശിയായ യുവതിയുടെ ഹരജിയിൽ മലപ്പുറം കുടുംബകോടതിയാണ്​ ഉത്തരവിട്ടത്​. പരസ്പര സമ്മതപ്രകാരം ഇരുവരും 2021 ഒക്ടോബറിൽ വിവാഹമോചിതരായിരുന്നു. ഇവരുടെ മൂന്ന്​ കുട്ടികളുടെയും സംരക്ഷണച്ചുമതല മാതാവിനായിരുന്നു നൽകിയത്​. വിദേശത്തുള്ള പിതാവ്​ നാട്ടിലെത്തുന്ന സമയത്ത്​ കുട്ടികളെ കാണാനും കൂടെ നിർത്താനും ഇരുവരും തമ്മിലുള്ള കരാർപ്രകാരം തീരുമാനിച്ചിരുന്നു. എന്നാൽ, ഫെബ്രുവരിയിൽ നാട്ടിലെത്തിയ പിതാവ്​ വീട്ടിലേക്ക്​ കൊണ്ടുപോയ കുട്ടികളെ പിന്നീട്​ വിദേശത്ത്​ എത്തിക്കുകയായിരുന്നു. എട്ട്​, ആറ്​, നാല്​ വയസ്സുള്ളവരാണ്​ കുട്ടികൾ​. ഇവരെ തിരികെ ലഭിക്കുന്നതിന്​ യുവതി ഹൈകോടതിയെ സമീപിച്ചെങ്കിലും മലപ്പുറം കുടുംബ കോടതിയിൽ ഹരജി നൽകാനായിരുന്നു നിർദേശം. തുടർന്ന്​ മലപ്പുറം കുടുംബ കോടതി കുട്ടികളെ ഹാജരാക്കാൻ ആവശ്യ​പ്പെട്ടെങ്കിലും പിതാവ്​ ഹാജരാക്കിയില്ല. മാതാവ്​ വീണ്ടും ഹൈകോടതിയെ സമീപിച്ചതോടെ കോടതി നിർദേശപ്രകാരം പിതാവ്​ കുട്ടികളെ ഹാജരാക്കി. ഇരുവരുടെയും വാദംകേട്ട കോടതി വിഷയത്തിൽ തീരുമാനമെടുക്കാൻ മലപ്പുറം കുടുംബ കോടതിയോട്​ നിർദേശിച്ചു. ഇതനുസരിച്ചാണ്​ മൂന്ന്​ കുട്ടികളെയും ഉടൻ മാതാവിന്​ കൈമാറാൻ ഉത്തരവായത്​. വിവാഹമോചന സമയത്തുള്ള കരാർ പ്രകാരം കുട്ടികളെ കാണാനും ഞായറാഴ്ചകളിൽ വിഡിയോ കോൺഫറൻസ്​ വഴി കുട്ടികളുമായി സംസാരിക്കാനും പിതാവിന്​ അനുവാദം നൽകിയിട്ടുണ്ട്​. ഹരജിക്കാരിക്ക്​ വേണ്ടി അഡ്വ. കെ.കെ. സമദ്​ ഹാജരായി.