നെടുങ്കയം ബദൽ സ്കൂൾ അടച്ചുപൂട്ടാനുള്ള തീരുമാനം പുനഃപരിശോധിക്കണം -എ.ഐ.വൈ.എഫ്

കരുളായി: നെടുങ്കയം ബദൽ സ്കൂൾ അടച്ചുപൂട്ടാനുള്ള തീരുമാനം പുനഃപരിശോധിക്കണമെന്ന് എ.ഐ.വൈ.എഫ് മേഖല കമ്മിറ്റി ആവശ്യപ്പെട്ടു. ഉച്ചക്കുളത്ത് പ്രവർത്തിക്കുന്ന ട്രൈബൽ സ്കൂൾ നെടുങ്കയത്തേക്ക് മാറ്റിസ്ഥാപിക്കുകയോ അല്ലാത്തപക്ഷം നെടുങ്കയം എൽ.പി സ്കൂളാക്കി ഉയർത്തുകയോ വേണമെന്ന് എ.ഐ.വൈ.എഫ് പ്രവർത്തകർ ആവശ്യപ്പെട്ടു. അധികൃതരുടെ ഭാഗത്തുനിന്ന്​ അനുകൂലതീരുമാനം ഉണ്ടായില്ലെങ്കിൽ രക്ഷിതാക്കളെയും കോളനിവാസികളെയും പങ്കെടുപ്പിച്ച് സമരപരിപാടികളിലേക്ക് കടക്കാൻ സംഘടന നിർബന്ധിതരാകുമെന്ന്​ സംഘടന പ്രതിനിധികൾ പറഞ്ഞു. നെടുങ്കയം കമ്യൂണിറ്റി ഹാളിൽ ചേർന്ന യോഗത്തിൽ ഷുഹൈബ് മൈലമ്പാറ അധ്യക്ഷത വഹിച്ചു. ഇയാസ് പനോളി, മനീഷ് നെടുങ്കയം, ശ്രീരാഗ്, ഗംഗ നന്ദന, സുമിജ, സന്ധ്യ, മിഥുൻ, സഞ്ജയ് എന്നിവർ സംബന്ധിച്ചു.