വടക്കേക്കാട് കലുങ്ക് നിർമാണം: ഗതാഗത നിയന്ത്രണം

വടക്കേക്കാട്: കലുങ്ക് നിർമാണത്തിന്‍റെ ഭാഗമായി വാഹന ഗതാഗതത്തിൽ നിയന്ത്രണം ഏർപ്പെടുത്തി. വടക്കേക്കാട് പഞ്ചായത്തിൽ ബസ് ജീവനക്കാരുമായി നടത്തിയ ചർച്ചയിലാണ് നിയന്ത്രണമേർപ്പെടുത്തിയത്. ഗുരുവായൂർ, ചാവക്കാട് ഭാഗത്തുനിന്ന് പൊന്നാനി ഭാഗത്തേക്ക്​ പോകേണ്ട ഭാരവാഹനങ്ങൾ മുഖംമൂടി മുക്കിൽനിന്ന് വലത്തേക്ക്​ തിരിഞ്ഞ് നമ്പീശൻ പടിയിൽനിന്ന് ഇടത്തോട്ട് തിരിഞ്ഞ് ഞമനേങ്ങാട്- ഐ.സി.എ വട്ടേമ്പാടം വഴി, കല്ലിങ്കൽ -വടക്കേക്കാട് സെന്‍റർ വഴി, ആൽത്തറ പൊന്നാനി റോഡിലേക്ക്​ പ്രവേശിക്കണമെന്ന് ചാവക്കാട് അസി. എൻജിനീയർ അറിയിച്ചു. കുന്നംകുളം ഭാഗത്തുനിന്ന് വരുന്ന ഭാരവാഹനങ്ങളും ഇതേവഴി പോകേണ്ടതാണ്. പൊന്നാനി ഭാഗത്തുനിന്ന് വരുന്ന വാഹനങ്ങൾ വടക്കേക്കാട് സെന്‍ററിൽനിന്ന് ഇടത് തിരിഞ്ഞ് കല്ലിങ്കൽ -ഐ.സി.എ വട്ടേമ്പാടം -ഞമനേങ്ങാട് -നമ്പീശൻ പടിയിൽനിന്ന് ഇടത്തോട്ട് തിരിഞ്ഞ് കുന്നംകുളം ഭാഗത്തേക്കും വലത്തോട്ട് തിരിഞ്ഞ് മുഖംമൂടിമുക്ക് വഴി ഗുരുവായൂർ, ചാവക്കാട് ഭാഗത്തേക്ക്​ പോകേണ്ടതാണ്. പുതിയ കലുങ്ക്​ നിർമിക്കുന്ന റോഡിൽ താൽക്കാലികമായി ഉണ്ടാക്കുന്ന റോഡിലൂടെ ബസ് ഒഴികെയുള്ള വാഹനങ്ങൾ കടത്തിവിടില്ല.