കനത്ത മഴ: കരിപ്പൂരിൽ അഞ്ചു​ വിമാനങ്ങൾ തിരിച്ചുവിട്ടു

കരിപ്പൂർ: കനത്ത മഴയെ തുടർന്ന്​ കോഴിക്കോട്​ വിമാനത്താവളത്തിൽ അഞ്ചു​ വിമാനങ്ങൾ തിരിച്ചുവിട്ടു. വ്യാഴാഴ്ച പുലർച്ച 2.30നും 4.40നും ഇട​യിൽ ഇറങ്ങേണ്ട വിമാനങ്ങളാണ്​ ​നെടുമ്പാശ്ശേരി വിമാനത്താവളത്തിലേക്ക്​​ തിരിച്ചുവിട്ടത്​. പുലർച്ച 2.30ന്​ ദോഹയിൽനിന്നുള്ള ഖത്തർ എയർ​വേസ്​, 2.35ന്​ അബൂദബിയിൽനിന്നുള്ള എയർഇന്ത്യ എക്സ്​പ്രസ്​, 3.30ന്​ ഷാർജയിൽനിന്നുള്ള എയർ അറേബ്യ, 4.25ന്​ അബൂദബിയിൽനിന്നുള്ള എയർ അറേബ്യ, 4.40ന്​ ബഹ്​റൈനിൽനിന്നുള്ള ഗൾഫ്​ എയർ വിമാനങ്ങളാണ്​ തിരിച്ചുവിട്ടത്​. ഗൾഫ്​ എയർ വിമാനം അൽപസമയത്തിനകം തിരിച്ചെത്തി തുടർ സർവിസ്​ നടത്തി. 5.30ന്​ പോകേണ്ട വിമാനം 8.19നാണ്​​ ബഹ്​റൈനിലേക്ക്​ മടങ്ങിയത്​. ഖത്തർ എയർവേസ് രാവിലെ ആറിന്​ വീണ്ടും കരിപ്പൂരിൽ ഇറങ്ങാൻ ശ്രമിച്ചെങ്കിലും റൺവേ വ്യക്തമാകാത്തതിനാൽ ​കൊച്ചിയിലേക്ക്​ മടങ്ങിപ്പോയി. പൈലറ്റുമാരുടെ ഡ്യൂട്ടി സമയം അവസാനിച്ചതിനെ തുടർന്ന്​ യാത്രക്കാ​രെ വാഹനത്തിൽ കോഴിക്കോട്​ എത്തിക്കുകയായിരുന്നു. വിമാനം രാത്രിയിൽ കരിപ്പൂരിലെത്തി പുലർച്ച 1.10നാണ് ദോഹയിലേക്ക്​ പുറപ്പെടുക. എയർ അറേബ്യയുടെ പുലർച്ച 5.05നുള്ള അബൂദബി, 4.10നുള്ള ഷാർജ സർവിസുകൾ വിമാനം തിരിച്ചെത്താൻ വൈകിയതിനാൽ നീണ്ടു. ഇതോടെ​ യാത്രക്കാർ പ്രതിഷേധവുമായി രംഗത്തെത്തി​. ബദൽ സൗകര്യം ഏർപ്പെടുത്തിയില്ലെന്നായിരുന്നു യാത്രക്കാരുടെ ആരോപണം. പിന്നീട്​ രാവിലെ 11ഓടെയാണ്​ ഇരു വിമാനത്തിലെയും യാത്രികരെ കോഴിക്കോട്​ ഹോട്ടലിലേക്ക്​ മാറ്റിയത്​. എയർ അറേബ്യ വിമാന സർവിസുകൾ പിന്നീട്​ പുനഃക്രമീകരിച്ചു.