നിയമപോരാട്ടത്തിലൂടെ ഭൂമി തിരിച്ചുപിടിച്ചതായി ലീഗ് നേതാവ്

പരപ്പനങ്ങാടി: സ്വന്തമായി വാങ്ങിയ ഭൂമിയെ തർക്കഭൂമിയായും കൈയേറ്റ ഭൂമിയായും മുദ്രയടിച്ചത്​ നിയമപോരാട്ടത്തിലൂടെ തിരിച്ചുപിടിച്ചെന്ന് മുനിസിപ്പൽ മുസ്​ലിം ലീഗ് പ്രസിഡന്‍റും എസ്.ടി.യു സംസ്ഥാന സെക്രട്ടറിയുമായ ഉമ്മർ ഒട്ടുമ്മൽ വാർത്തസമ്മേളനത്തിൽ പറഞ്ഞു. സർക്കാർ ഭൂമി തട്ടിയെടുത്തതാണന്ന്​ പ്രചരിപ്പിക്കുകയും ഇടത് ഭരണസ്വാധീനം ഉപയോഗിച്ച് വില്ലേജ് ഓഫിസറെ കൊണ്ട് സ്റ്റോപ്പ് മെമ്മോ കൊടുപ്പിക്കുകയും ​​ചെയ്തിരുന്നു. പരപ്പനങ്ങാടി വില്ലേജിലെ മുറിത്തോടിന്നടുത്ത ഭൂമി ഹൈകോടതി ഉത്തരവ് പ്രകാരം തിരൂരങ്ങാടി തഹസിൽദാർ എല്ലാ നിയമനടപടികളും പൂർത്തിയാക്കി. പരപ്പനങ്ങാടി വില്ലേജ് ഓഫിസർ നികുതി സ്വീകരിച്ച്​ സ്ഥലത്തിന്‍റെ ഉടമസ്ഥാവകാശം സ്ഥിരീകരിച്ചതായും ഉമ്മർ ഒട്ടുമ്മൽ പറഞ്ഞു. വിഷയത്തിൽ തന്നെ അവഹേളിക്കുകയും അപമാനിക്കുകയും ചെയ്തവർ മാന്യതയുണ്ടെങ്കിൽ നേരത്തേ നടത്തിയ അപവാദപ്രചാരണത്തോട് പ്രതികരിക്കണമെന്നും ആവശ്യപ്പെട്ടു. ലീഗ് നേതാക്കളായ സി.ടി. നാസർ, പി.പി. ഷാഹുൽ ഹമീദ്, അങ്ങമൻ കുഞ്ഞിമോൻ എന്നിവരും വാർത്തസമ്മേളനത്തിൽ സംബന്ധിച്ചു.