എസ്​.എസ്​.എൽ.സി പരീക്ഷ തോറ്റവർക്ക്​ ഉല്ലാസയാത്രയുമായി മാറാക്കര ഗ്രാമപഞ്ചായത്ത്‌

കാടാമ്പുഴ: എസ്​.എസ്​.എൽ.സി പരീക്ഷയിൽ പരാജയപ്പെട്ടവർക്ക് ആശ്വാസവും പിന്തുണയുമേകാൻ മാറാക്കര ഗ്രാമപഞ്ചായത്ത്‌ രംഗത്ത്​. തോറ്റവർക്ക് വലിയ വിജയത്തിലേക്കുള്ള വഴിതുറക്കാൻ 'ജയിക്കാനായി തോറ്റവർക്കൊപ്പം' എന്ന പദ്ധതി തയാറാക്കിയിരിക്കുകയാണ്​ പഞ്ചായത്ത്‌. ഉല്ലാസയാത്ര, ഫാന്‍റസി പാർക്കിൽ ഒരു ദിവസത്തെ വിനോദം, സൈക്കോളജിസ്റ്റുകളുടെ നേതൃത്വത്തിൽ കൗൺസലിങ്​, മാനസിക സമ്മർദവും നിരാശയും കുറക്കാൻ മൈൻഡ് റിലാക്സേഷൻ കളികൾ തുടങ്ങിയവയിലൂടെയാണ് കുട്ടികളെ ഊർജസ്വലരാക്കുക. ഇത്തരം കുട്ടികൾക്ക് തുടർ പഠന സഹായമടക്കം നൽകാൻ പഞ്ചായത്ത്‌ ഒരുക്കമാണെന്ന് പ്രസിഡന്‍റ്​ ടി.പി. സജ്‌ന, വൈസ് പ്രസിഡന്‍റ്​ ഉമറലി കരേക്കാട് എന്നിവർ അറിയിച്ചു.