ചിറക്കൽ ഓവുപാലം റോഡ് ബി.ജെ.പി ഉപ​രോധിച്ചു

താനൂർ: രായിരിമംഗലം-ചിറക്കൽ ഓവുപാലം റോഡ് ബി.ജെ.പി പതിനാറാം ബൂത്ത് കമ്മിറ്റി നേതൃത്വത്തിൽ ഉപരോധിച്ചു. തെയ്യാല റോഡിൽ റെയിൽവേ ഓവർ ബ്രിഡ്ജിന്‍റെ പണി നടക്കുന്നതിനാൽ രായിരിമംഗലം-ചിറക്കൽ ഓവുപാലം റോഡ് വഴിയാണ് വാഹനങ്ങൾ കടന്നുപോകുന്നത്. ധാരാളം വാഹനങ്ങൾ കടന്നു പോകുന്നതിനാൽ റോഡാകെ പൊട്ടിപ്പൊളിഞ്ഞ അവസ്ഥയിലാണ്. ഓവുപാലത്തിനടിയിലൂടെയുള്ള യാത്രയിൽ ഇരുചക്രവാഹനങ്ങൾ മറിഞ്ഞു വീഴുന്നതും പതിവാണ്. പാലം പണി നടക്കുന്ന സാഹചര്യത്തിൽ പതിനഞ്ചാം ഡിവിഷനിലൂടെ കടന്നു പോകുന്ന ഈ റോഡിന്‍റെ അറ്റകുറ്റപ്പണികൾ നടത്താം എന്ന് പറഞ്ഞ മന്ത്രി വി. അബ്ദുറഹിമാനും അധികാരികളും ഉറപ്പ് പാലിക്കാതിരിക്കുകയും കാൽനട പോലും ദുസ്സഹമാകുകയും ചെയ്ത സാഹചര്യത്തിലാണ് ബി.ജെ.പി നേതൃത്വത്തിൽ നാട്ടുകാർ റോഡ് ഉപരോധിച്ചത്. രായിരിമംഗലം ഈസ്റ്റ് ജി.എൽ.പി സ്കൂളിന്​ അടുത്തുനിന്ന്​ തുടങ്ങിയ പ്രകടനം കിഴക്കേ മുക്കോലയിൽ അവസാനിച്ചു. പിന്നീട് റോഡ് ഉപരോധിച്ചു. സമരം ബി.ജെ.പി ജില്ല അധ്യക്ഷൻ രവി തേലത്ത് ഉദ്ഘാടനം ചെയ്തു. ബൂത്ത് പ്രസിഡന്‍റ്​ രതീഷ് സ്വാഗതം പറഞ്ഞു. വാർഡ് കൗൺസിലർ ബീന അധ്യക്ഷത വഹിച്ചു. ഭാസ്കരൻ ആനപ്പടി നന്ദി പറഞ്ഞു. മണ്ഡലം പ്രസിഡന്‍റ്​ പ്രിയേഷ് കാർക്കോളി, ജനറൽ സെക്രട്ടറി പ്രവീൺ, ഏരിയ പ്രസിഡന്‍റുമാരായ ദിബീഷ്, കൃഷ്ണൻ, പ്രഭാകരൻ, പുഷ്പരാജൻ, വിജയൻ, മുസ്തഫ, മല്ലിക, ഗീത, ജിൽസ തുടങ്ങിയവർ നേതൃത്വം നൽകി.