മുഖ്യമ​ന്ത്രിയുടെ പരിപാടി: പൊലീസ്​ ഒരുക്കിയത്​ അസാധാരണ സുരക്ഷ

മലപ്പുറം: മുഖ്യമന്ത്രി പിണറായി വിജയന്‍റെ ജില്ലയിലെ പരിപാടികളോടനുബന്ധിച്ച്​ പൊലീസ്​ ഒരുക്കിയത്​ അസാധാരണ സുരക്ഷ. ഞായറാഴ്ച രാവിലെ തവനൂർ സെൻട്രൽ ജയിൽ ഉദ്ഘാടനത്തിലും തുടർന്ന് പുത്തനത്താണിയിലെ ഇ.എം.എസ് സെമിനാറിലും പങ്കെടുക്കാനാണ് മുഖ്യമന്ത്രി എത്തിയത്​. മുഖ്യമന്ത്രി ജില്ലയിലേക്ക്​ പ്രവേശിക്കുന്നതുമുതൽ പ്രതിപക്ഷ സംഘടനകൾ പ്രതിഷേധവുമായെത്തുമെന്ന നിഗമനത്തിൽ പൊലീസ്​ കനത്ത സുരക്ഷയാണൊരുക്കിയത്​. ​ സുരക്ഷക്രമീകരണത്തിന്​ ആയിരത്തോളം പൊലീസുകാരെയാണ്​ നിയോഗിച്ചത്​. എം.എസ്.പിയിൽനിന്നും മറ്റു ബറ്റാലിയനിൽനിന്നും പൊലീസുകാർ സുരക്ഷയുടെ ഭാഗമായെത്തിയിരുന്നു. ജില്ല പൊലീസ് മേധാവി സുജിത്ത് ദാസിന്‍റെ നേതൃത്വത്തിൽ ജില്ലയിലെ ഡിവൈ.എസ്​.പിമാരുടെ കീഴിലാണ്​ സുരക്ഷയൊരുക്കിയത്​. ആറ്​​ ഡിവൈ.എസ്​.പിമാർക്ക്​​ ഓരോ പ്രദേശത്തിന്‍റെയും പ്രത്യേക ചുമതല നൽകി. ഇവരുടെ കീഴിൽ 25 സ്​റ്റേഷൻ ഓഫിസർമാരും സുരക്ഷക്രമീകരണങ്ങൾക്ക്​ നേതൃത്വം നൽകി. ​പ്രധാന മേഖലകളിലെല്ലാം നാല്​ പൊലീസുകാർ വീതം നിലയുറപ്പിച്ചിരുന്നു. തവനൂർ ജയിലിന്‍റെ ചുറ്റുവട്ടത്തുമാത്രം നൂറിലധികം പൊലീസുകാരുണ്ടായിരുന്നു. മുഖ്യമന്ത്രിയുടെ സഞ്ചാരപാതയിലും സമീപ പ്രദേശങ്ങളിലുമെല്ലാം പൊലീസിന്‍റെ കനത്ത കാവലുണ്ടായിരുന്നു. സംസ്ഥാന അതിർത്തിയായ ചങ്ങരംകുളത്തും കൂടുതൽ സുരക്ഷയൊരുക്കിയിരുന്നു. പ്രതിഷേധങ്ങളുയരാൻ കൂടുതൽ സാധ്യതയുള്ള മേഖലകളിലെല്ലാം നിയ​ന്ത്രണം ശക്തമാക്കിയിരുന്നു. ദേശീയപാതയിലും സംസ്ഥാനപാതയിലുമെല്ലാം പൊലീസ്​ കർശന നിയന്ത്രണം ഏർപ്പെടുത്തിയതോടെ വാഹന ഗതാഗതം ദീർഘനേരം തടസ്സ​​​പ്പെട്ടു. കനത്ത സുരക്ഷയിലും വിവിധ സംഘടനകളുടെ നേതൃത്വത്തിൽ മുഖ്യമന്ത്രിക്കെതിരെ വിവിധ ഭാഗങ്ങളിൽ പ്രതി​ഷേധമുയർന്നു. --------------------------------- നിയന്ത്രണം അറിയാതെ ജനം​, വഴിമുട്ടിച്ച്​ സുരക്ഷവലയം... മലപ്പുറം/കുറ്റിപ്പുറം: മുഖ്യമന്ത്രിയുടെ പരിപാടിയോടനുബന്ധിച്ച്​ പൊലീസ്​ ഏർ​​പ്പെടുത്തിയ കർ​ശന ഗതാഗതനിയ​ന്ത്രണങ്ങൾ പൊതുജനത്തെ വലച്ചു. മണിക്കൂറുകളോളം ദേശീയപാതയിലും സംസ്ഥാനപാതയിലും ഗതാഗതം തട​സ്സപ്പെട്ടു. ഗതാഗത നിയന്ത്രണമുണ്ടാകുമെന്ന്​ പൊലീസ്​ മുൻകൂട്ടി അറിയിപ്പ്​ നൽകാത്തതിനാൽ നിരവധി യാത്രക്കാരാണ്​ വഴിമുട്ടി പ്രതിസന്ധിയിലായത്​. ​ കുറ്റിപ്പുറം-പൊന്നാനി ദേശീയപാതയിലും എടപ്പാൾ-കുറ്റിപ്പുറം-ചങ്ങരംകുളം സംസ്ഥാനപാതയിലുമാണ്​ ഗതാഗതം ഏറെ നേരം സ്തംഭിച്ചത്​. കുറ്റിപ്പുറം-പൊന്നാനി ദേശീയപാതയിൽ ബാരിക്കേഡ് സ്ഥാപിച്ചത് കാരണം പൊന്നാനിയിൽനിന്ന് വാഹനങ്ങൾ വഴിതിരിച്ചു വിട്ടിരുന്നു. ബാരിക്കേഡ്​ വെച്ച്​ അടച്ചത്​​ ദേശീയപാതയിൽ ഗതാഗതക്കുരുക്ക്​ രൂക്ഷമാക്കി​. വഴിതിരിച്ചുവിട്ട വാഹനങ്ങൾ മറ്റു റോഡുകളിലൂടെ ഒരുമിച്ചെത്തിയതും ഗതാഗത തടസ്സമുണ്ടാക്കി. ദേശീയപാതയിൽ രണ്ട്​ മണിക്കൂറോളം ഗതാഗതം സ്തംഭിച്ചു. സംസ്ഥാനപാതയിൽ മുഖ്യമന്ത്രിയുടെ വാഹനം കടന്നുപോയപ്പോഴും അര മണിക്കൂറോളം ഗതാഗതം തടസ്സപ്പെട്ടു. പൊലീസ്​ നിയന്ത്രണത്തോടൊപ്പം പ്രതിഷേധങ്ങളും ഗതാഗത തടസ്സത്തിന്​ ഇടയാക്കി. മുഖ്യമന്ത്രിക്കെതിരെ കരിങ്കൊടി കാണിക്കാനെത്തിയ പ്രതിഷേധക്കാർ മന്ത്രി വി. അബ്ദുറഹ്മാന്‍റെ വാഹനം തടഞ്ഞതിനു പിന്നാലെയും ഗതാഗത തടസ്സം നേരിട്ടു. മന്ത്രിയുടെ വാഹനം കടത്തിവിടു​ന്നതിനിടെ മറ്റു വാഹന യാത്രികർ ഗതാഗത തടസ്സത്തിൽ ക്ഷുഭിതരായി പൊലീസുമായി വാക്ക്​തർക്കവും ഉണ്ടായി.