കരിപ്പൂർ വിമാനദുരന്തം: ഒമ്പതംഗ സമിതി റിപ്പോർട്ടിലും എയർ ഇന്ത്യ എക്സ്​പ്രസിനെതിരെ പരാമർശം

കരിപ്പൂർ: കോഴി​ക്കോട്​ വിമാനത്താവളത്തിലെ വിമാനാപകടത്തിന്‍റെ പശ്​ചാത്തലത്തിൽ നിയോഗിച്ച സമിതി റിപ്പോർട്ടിലും എയർ ഇന്ത്യ എക്സ്​പ്രസിനെതിരെ പരാമർശങ്ങൾ. ക്രൂ റിസോഴ്​സ്​ മാനേജ്​മെന്‍റ്​ ഉൾപ്പെടെയുള്ളവക്ക്​ എതിരെയാണ്​ വിമർശനം​. അപകടം അന്വേഷിച്ച എയർ ക്രാഫ്​റ്റ്​ ആക്സിഡന്‍റ്​ ഇൻവെസ്റ്റിഗേഷൻ ബ്യൂറോ (എ.എ.ഐ.ബി) റിപ്പോർട്ടിലും സമാന വിഷയങ്ങളുണ്ടായിരുന്നു. എ.എ.ഐ.ബി അന്വേഷണ സംഘത്തിന്‍റെ റിപ്പോർട്ടിലെ 43 നിർദേശങ്ങൾ പഠിക്കാനാണ്​ കേന്ദ്ര വ്യോമയാന മന്ത്രാലയം ഒമ്പതംഗ സമിതിയെ നിയോഗിച്ചത്​. ഈ റിപ്പോർട്ട്​ ഈയിടെയാണ്​ പുറത്ത്​ വന്നത്​. 2020 ആഗസ്റ്റ്​ ഏഴിനായിരുന്നു വിമാനാപകടം. എക്സ്​പ്രസ്​ കൂടുതൽ സർവിസ്​ നടത്തുന്ന വിമാനത്താവളമായ കരിപ്പൂരിൽ 26 ഫസ്റ്റ്​ ഓഫിസർമാരെയാണ്​ കമ്പനി നിയോഗിച്ചത്​. ഇത്രയും പേർക്ക്​ ഒരു ക്യാപ്​റ്റൻ മാത്രമാണുള്ളത്​. അപകടത്തി​ൽപ്പെട്ട വിമാനത്തിന്‍റെ പൈലറ്റ്​ ഇൻ കമാൻഡായ ദീപക്​ സാഥെയാണ്​ ഏക ക്യാപ്​റ്റൻ. അപകടം നടന്നതിന്​ അടുത്ത ദിവസം രാവിലെയുള്ള ദോഹ വിമാനത്തിലെയും ക്യാപ്​റ്റൻ ഇദ്ദേഹമായിരുന്നു. ദോഹ വിമാനത്തി​ന്‍റെ സ്​റ്റാൻഡ്​​ബൈ ക്യാപ്​റ്റനായിട്ടായിരുന്നു സാഥെയെ ആദ്യം തീരുമാനിച്ചത്​. ഒടുവിൽ ഏഴിനാണ്​ ഇദ്ദേഹത്തിനോട്​ ദോഹ വിമാനവും നിയന്ത്രിക്കാൻ ആവശ്യപ്പെട്ടത്​. പെ​ട്ടെന്നുണ്ടായ ഡ്യൂട്ടിമാറ്റവും അപകടത്തെ സ്വാധീനിക്കുന്ന ഘടകങ്ങളായി അന്വേഷണ റിപ്പോർട്ടിലുണ്ടായിരുന്നു. ആവശ്യത്തിന്​ ഉദ്യോഗസ്ഥരെ ലഭ്യമാക്കാത്ത വിമാനകമ്പനിയുടെ എച്ച്​.ആർ നയം അപകടത്തിലേക്കുള്ള ഘടകമായി പുതിയ റിപ്പോർട്ടിലും പറയുന്നു​. ഈ വിഷയങ്ങളിൽ നടപടി സ്വീകരിച്ചതായി എയർ ഇന്ത്യ എക്സ്​പ്രസ്​ വിദഗ്​ധ സമിതിക്ക്​ റിപ്പോർട്ട്​ സമർപ്പിച്ചിട്ടുണ്ട്​.