ഇറക്കുമതി ചെയ്ത ജീവികളെ വളർത്തുന്നതിൽ കേരളം​ രണ്ടാം സ്ഥാനത്തെന്ന്​ കണക്കുകൾ

പാലക്കാട്​: ഇറക്കുമതി ചെയ്ത ജീവികളെ വളർത്തുന്നതിൽ കേരളത്തിന്​ രാജ്യത്ത്​ രണ്ടാം സ്ഥാനമെന്ന്​ കണക്കുകൾ. കോവിഡ്​ വ്യാപനത്തിന്‍റെ പശ്ചാത്തലത്തിൽ കേന്ദ്രസർക്കാർ നടത്തിയ വിവരശേഖരണത്തിലാണ്​ സംസ്ഥാനത്ത്​ ഇത്തരം ജീവികളെ വളർത്തുകയും വിൽക്കുകയും ചെയ്യുന്ന പ്രവണത വർധിക്കുന്നതായി വിവരമുള്ളത്​. കോവിഡ് വ്യാപനത്തോടനുബന്ധിച്ച്​ അനിയന്ത്രിതമായ വന്യജീവി വിൽപ്പനയും കൈമാറ്റവും വലി​യ തോതിൽ പകർച്ചവ്യാധികൾ പരക്കുന്നതിന്​ കാരണമാകുന്നുവെന്ന്​ ലോകാരോഗ്യസംഘടനയുടെ പഠനത്തെ കൂടി കണക്കിലെടുത്തായിരുന്നു കേ​ന്ദ്രസർക്കാർ നടപടി. 2020 ജൂൺ മുതൽ 2021 മാർച്ച്​ വരെ 32,645 പേരാണ് വിവരങ്ങൾ നൽകിയത്​. ​ 25 സംസ്ഥാനങ്ങളിൽ നിന്നും​ അഞ്ച്​ കേന്ദ്രഭരണ പ്രദേശങ്ങളിൽ നിന്നുമായി എത്തിയ അപേക്ഷകളിൽ 8460 ആണ്​​ കേരളത്തിൽ നിന്ന്​ ലഭിച്ചത്​. പശ്ചിമബംഗാളിൽ നിന്നാണ്​ ഏറ്റവുമധികം അപേക്ഷകൾ എത്തിയത് -9764. വളർത്താനെത്തിക്കുന്ന ജീവികളിൽ പലതിനെയും പിൽക്കാലത്ത്​ ഉടമകൾ പരിസരത്ത്​ തുറന്ന്​ വിടുന്നത്​ ഗുരുതരമായ പാരിസ്ഥിതിക പ്രത്യാഘാതങ്ങൾ സൃഷ്ടിക്കുന്നതായി വിദഗ്​ധർ ചൂണ്ടിക്കാണിക്കുന്നു. ചുവന്ന ചെവിയൻ ആമകൾ മുതൽ പിരാനയും ആഫ്രിക്കൻ മുഷിയും വരെ ഇത്തരത്തിൽ വളർത്താനെത്തിച്ചവയിൽ നിന്ന്​ പുറത്തെത്തിയവയാണെന്നാണ്​ നിഗമനം​. വളർത്താനെന്നപേരിൽ അനധികൃതമായി വിദേശരാജ്യങ്ങളിൽ നിന്ന്​ കടത്തിയെത്തിക്കുന്ന ജീവികളിലൂടെ മാരക രോഗങ്ങളടക്കം പകരാനുള്ള സാധ്യതയുമേറെയാണ്​. ജീവികളുടെ ശരീരത്തെ പരാദങ്ങൾ, സൂക്ഷ്മാണുക്കൾ എന്നിവ സംബന്ധിച്ച്​ കാര്യമായ മുൻകരുതലുകളൊന്നുമില്ലാതെയാണ്​ ഇവയെ വിപണികളിൽ എത്തിക്കുന്നത്​. ഓമനമൃഗങ്ങളെന്ന് പേരിട്ടുവിളിക്കുന്ന അധിനിവേശ മൃഗങ്ങൾ ഭാവിയിൽ ആവാസവ്യവസ്ഥയിൽ കാര്യമായ ചലനമുണ്ടാക്കാൻ തക്കതാണെന്ന് അനിമൽ ഡിസീസ് കണ്ട്രോൾ പ്രൊജക്റ്റ് പാലക്കാട്​ ജില്ല എപിഡമോളജിസ്റ്റ് ഡോ. ജോജു ഡേവിസ്, ഡോ. ദിലീപ്​ ഫൽഗുണൻ എന്നിവർ പറഞ്ഞു. മറ്റൊരു പരിസ്ഥിതിയിൽ ഇണങ്ങിയ ജീവി പുതിയ ഇടത്തിലെത്തുമ്പോൾ പുതിയ രോഗങ്ങളും വൈറസുകളും എത്താൻ സാധ്യതയുണ്ട്​​. എന്നാൽ ഇതുസംബന്ധിച്ച്​ ക്രോഡീകരിച്ച വിവരങ്ങൾ ലഭ്യമല്ലെന്നും ഇരുവരും 'മാധ്യമ'ത്തോട്​ പറഞ്ഞു. -ബിനോയ്​ തോമസ്​