വാച്ചർ രാജനെ കാണാതായിട്ട്​ ഒരു മാസം; എങ്ങുമെത്താതെ അന്വേഷണം

അഗളി: സൈലന്‍റ്​ വാലി സൈരന്ധ്രി വനമേഖലയിൽ നിന്ന്​ കാണാതായ വാച്ചർ പുളിക്കാഞ്ചേരി രാജന്‍റെ തിരോധാനത്തിന് ഒരു മാസം പിന്നിടുമ്പോഴും അന്വേഷണം എങ്ങുമെത്തിയില്ല. മെയ് മൂന്നിന് രാത്രി 8.30 ഓടെ സൈലന്‍റ്​ വാലി വനം ഡിവിഷനിലെ സൈരന്ധ്രി വാച്ച് ടവറിന്​ സമീപത്തെ മെസിൽ നിന്ന്​ ഭക്ഷണം കഴിച്ച് സമീപത്തെ ക്യാമ്പ് ഷെഡിലേക്ക് ഉറങ്ങാൻ പോയ രാജനെ പിന്നീടാരും കണ്ടിട്ടില്ല. ജൂൺ പതിനൊന്നിനാണ് മകൾ രേഖയുടെ വിവാഹം. വിവാഹത്തിന് കൈ പിടിച്ച്​ നൽകാൻ അച്ഛൻ വരുമോയെന്ന കാത്തിരിപ്പിലാണ് മകൾ. രാജന്‍റെ തിരോധാനത്തോടെ കല്യാണവീടിന്‍റെ സന്തോഷമെല്ലാം അന്യമായ അവസ്ഥയിലാണ് കുടുംബം തണ്ടർബോൾട്ട്, വനം വകുപ്പ്​ ദ്രുതകർമസേന തുടങ്ങിയവയെല്ലാം സൈലൻറ് വാലി വനമേഖലയിൽ തിരച്ചിൽ നടത്തിയെങ്കിലും സൂചനയൊന്നും ലഭിച്ചിട്ടില്ല.