നിലമ്പൂർ-ഷൊർണൂർ പാതയിൽ രാജ‍്യറാണിയുടെ മുഴുവൻ സ്റ്റോപ്പുകളും പുനഃസ്ഥാപിച്ചു

നിലമ്പൂര്‍: കൊച്ചുവേളി-നിലമ്പൂര്‍ രാജ്യറാണി എക്‌സ്​പ്രസിൽ നിര്‍ത്തലാക്കിയിരുന്ന മുഴുവന്‍ സ്‌റ്റോപ്പുകളും പുന:സ്ഥാപിച്ചു. കൊച്ചുവേളിയില്‍ നിന്ന്​ നിലമ്പൂരിലേക്ക് പുറപ്പെടുന്ന 16349 നമ്പര്‍ ട്രയിനില്‍ വ്യാഴാഴ്ച രാത്രി മുതല്‍ എല്ലാ സ്​റ്റോപ്പുകളും പ്രാബല്യത്തിലാവും. ഷൊര്‍ണൂര്‍-നിലമ്പൂര്‍ പാതയില്‍ അങ്ങാടിപ്പുറം, വാണിയമ്പലം, നിലമ്പൂര്‍ എന്നിവിടങ്ങളില്‍ മാത്രമേ നിലവില്‍ സ്‌റ്റോപ്പ് അനുവദിച്ചിരുന്നുള്ളൂ. ഇനി മുതല്‍ നിലമ്പൂർ-ഷൊർണൂർ പാതയിലെ വല്ലപ്പുഴ, ചെറുകര, പട്ടിക്കാട്, മേലാറ്റൂര്‍, തുവ്വൂര്‍ സ്‌റ്റേഷനുകളില്‍ നിര്‍ത്തും. തിരുവനന്തപുരം റീജനൽ കാൻസർ സെന്‍ററിലേക്കുള്ള രോഗികൾക്കും കുടുംബങ്ങൾക്കും ഉത്തരവ് ഏറെ ആശ്വാസകരമാവും. എ.സി 2 ടയര്‍-1, എ.സി 3 ടയര്‍-1, സ്ലീപര്‍ ക്ലാസ്-8, ജനറല്‍ സെക്കന്റ് ക്ലാസ് -4 എന്നിങ്ങനെ 14 കോച്ചുകളുമായാണ് കൊച്ചുവേളി-നിലമ്പൂര്‍ രാജ്യറാണി എക്‌സ്പ്രസ് സര്‍വിസ് നടത്തുന്നത്. രാജ്യറാണിക്ക് പുറമേ കോട്ടയം-നിലമ്പൂര്‍ എക്‌സ്​പ്രസ്, ഷൊര്‍ണൂര്‍ നിലമ്പൂര്‍ എക്‌സ്​പ്രസ് ഉള്‍പ്പെടെ മൂന്ന്​ ജോഡി സര്‍വിസുകളാണ് ഈ പാതയിലുള്ളത്. ഈ മാസം 30 മുതല്‍ ഷൊര്‍ണൂരില്‍ നിന്ന് നിലമ്പൂരിലേക്കും, തിരികെയും സ്‌പെഷല്‍ എക്‌സ്​പ്രസ് സര്‍വിസും ആരംഭിക്കുന്നുണ്ട്.